ന്യൂഡെൽഹി: പബ്ളിക് എന്റർപ്രൈസസ് സെലക്ഷൻ ബോർഡ് (പിഇഎസ്‌ബി) അധ്യക്ഷയായി മല്ലിക ശ്രീനിവാസനെ നിയമിച്ചു. നിലവിൽ ട്രാക്‌റ്റേഴ്‌സ് ആൻഡ് ഫാം എക്യുപ്മെന്റ് ലിമിറ്റഡ് ചെയർപേഴ്‌സണും മാനേജിംഗ് ഡയറക്‌ടറുമാണ് മല്ലിക ശ്രീനിവാസൻ.
സ്വകാര്യ മേഖലയിൽ നിന്ന് ഈ പദവിയിലേക്ക് നിയമിക്കപ്പെടുന്ന ആദ്യ വ്യക്‌തിയാണ്‌ മല്ലിക. ടിവിഎസ് മോട്ടോർ കമ്പനി ചെയർമാൻ വേണു ശ്രീനിവാസന്റെ ഭാര്യയാണ് മല്ലിക. ടാറ്റ സ്‌റ്റീലിന്റെ ബോർഡ് ഓഫ് ഡയറക്‌ടേഴ്‌സിലും ഇവരുണ്ട്. കേന്ദ്ര പൊതുമേഖല സംരംഭങ്ങളുടെ ഉന്നത പദവികളിൽ നിയമിക്കപ്പെടേണ്ടവരെക്കുറിച്ച് സർക്കാരിന് ശുപാർശ നൽകുകയെന്നതാണ് പിഇഎസ്‌ബിയുടെ കടമ. പിഇഎസ്ഇ അംഗമായി അസം-മേഘാലയ കേഡർ ഐഎഎസ് ഓഫീസർ ശൈലേഷിനെയും നിയമിച്ചു.
മന്ത്രിസഭയുടെ നിയമകാര്യ സമിതിയാണ് ഇതുസംബന്ധിച്ച് തീരുമാനമെ‌ടുത്തത്. ബോർഡിന്റെ ശുപാർശയില്ലാത്തതിനാൽ അൻപതിലേറെ സ്‌ഥാപനങ്ങളിലെ ഉന്നത സ്ഥാനങ്ങളിൽ നിയനം വൈകുന്നത് ഏറെ വിമർശനങ്ങൾ ക്ഷണിച്ചു വരുത്തിയിരുന്നു. ഇതിന് പിന്നാലെയാണ് പുതിയ നടപടി.
Read Also: ‘ഒരു താത്വിക അവലോകന’ത്തിനായി ജോജുവും കൂട്ടരുമെത്തുന്നു; ഫസ്‌റ്റ് ലുക്ക് കാണാം
