ചെന്നൈ: രാജീവ് ഗാന്ധി വധക്കേസ് പ്രതികളെ മോചിപ്പിക്കണമെന്ന് ആവശ്യപ്പെട്ട് തമിഴ്നാട് പ്രതിപക്ഷ നേതാവ് സ്റ്റാലിന് കേന്ദ്ര ആഭ്യന്തരമന്ത്രി അമിത് ഷാക്ക് കത്ത് നല്കി. കേസിലെ ഏഴ് പ്രതികളെയും മോചിപ്പിക്കണമെന്നാണ് ആവശ്യം. പ്രതികളെ വിട്ടയക്കണമെന്ന തമിഴ്നാട് സര്ക്കാരിന്റെ ശുപാര്ശയില് രണ്ട് വര്ഷമായി ഗവര്ണര് തീരുമാനം എടുത്തിട്ടില്ല.
Also Read: ലാവലിന് കേസിന്റെ നടപടികള് നീട്ടിവെക്കണം; സിബിഐ വീണ്ടും കത്ത് നല്കി
സര്ക്കാരിന്റെ ശുപാര്ശയില് ഗവര്ണറുടെ തീരുമാനം വൈകുന്നത് പ്രതിഷേധാര്ഹം ആണെന്ന് സ്റ്റാലിന് പറഞ്ഞു. തമിഴ്നാട് ഗവര്ണര് കഴിഞ്ഞ ദിവസം ഡെല്ഹിയിലെത്തി നരേന്ദ്രമോദിയേയും അമിത് ഷായെയും കണ്ടിരുന്നു. രാജീവ് ഗാന്ധി വധക്കേസ് പ്രതികളില് ഒരാളായ പേരറിവാളിന്റെ പരോള് അപേക്ഷ പരിഗണിക്കവേ, പ്രതികളെ വിട്ടയക്കണമെന്ന ശുപാര്ശയില് ഗവര്ണറുടെ തീരുമാനം വൈകുന്നതില് ചൊവ്വാഴ്ച സുപ്രീംകോടതി അതൃപ്തി അറിയിച്ചിരുന്നു. പേരറിവാളിന്റെ പരോള് അപേക്ഷ പരിഗണിക്കുന്നത് നവംബര് 23ലേക്ക് മാറ്റി.