ഉന്നാവ്: ഉത്തര്‍പ്രദേശിലെ വിവിധ സ്‌ഥലങ്ങളില്‍ ശ്‌മശാനങ്ങള്‍ ഹിന്ദു-മുസ്‌ലിം ജനസംഖ്യയുടെ അടിസ്‌ഥാനത്തില്‍ വേര്‍തിരിക്കണമെന്ന് ബി.ജെ.പി. എം.പി. സാക്ഷി മഹാരാജ്. മുസ്‌ലിങ്ങള്‍ മരിച്ചവരെ ഖബറടക്കുന്നതിനു പകരം ഹിന്ദുക്കളുടേതിനു സമാനമായ രീതിയില്‍ ദഹിപ്പിക്കണമെന്നും എം പിയുടെ വിവാദ പരാമര്‍ശം. ബംഗര്‍മാവ് ഉപതിരഞ്ഞെടുപ്പിലെ ബി.ജെ.പി. സ്‌ഥാനാര്‍ഥി ശ്രീകാന്ത് കത്തിയവാഡിനെ പിന്തുണച്ചുള്ള പൊതുയോഗത്തില്‍ സംസാരിക്കുകയായിരുന്നു സാക്ഷി മഹാരാജ്.
രാജ്യത്ത് എല്ലാ വിഭാഗക്കാരും മരണപ്പെട്ടവരുടെ ശവദാഹം നടത്തണമെന്നും ഇതിനായി നിയമം കൊണ്ടുവരണമെന്നും ബിജെപി എംപി ആവശ്യപ്പെട്ടു. ‘രാജ്യത്ത് ഏകദേശം രണ്ടരക്കോടി സന്ന്യാസിമാരുണ്ട്. എല്ലാവര്‍ക്കുമായി ഞങ്ങള്‍ സമാധി പണിയാന്‍ തുടങ്ങിയാല്‍ ആവശ്യമുള്ള ഭൂമിയുടെ അളവ് ഊഹിക്കാവുന്നതേയുള്ളൂ. അതുപോലെ, ഇന്ത്യയില്‍ 20 കോടി മുസ്‌ലിങ്ങളുണ്ട്, എല്ലാവരും ഖബറടക്കം നടത്തിയാലുള്ള അവസ്‌ഥയെന്താകും?’ സാക്ഷി മഹാരാജ് ചോദിച്ചു. ഇത് തുടര്‍ന്നാല്‍ രാജ്യത്ത് കൃഷിക്കായി ഭൂമി പോലും അവശേഷിക്കുകയില്ലെന്നും അതിനാല്‍ എല്ലാവരും ശവദാഹം നടത്തണമെന്നും സാക്ഷി പറഞ്ഞു.
Read Also: ഹത്രസ് കേസില്‍ കോടതി മേല്‍നോട്ടത്തില്‍ അന്വേഷണം; വിധി ഇന്ന്
എം പിയുടെ വിവാദ പരാമര്‍ശത്തിനെതിരെ വന്‍ പ്രതിഷേധമാണ് ഉയരുന്നത്. ബി.ജെ.പി. വിദ്വേഷ രാഷ്‌ട്രീയം പിന്തുടരുകയാണെന്നും എല്ലാ തിരഞ്ഞെടുപ്പിലും അവര്‍ അത് തന്നെയാണ് ചെയ്യുന്നതെന്നും ആരോപിച്ച് സമാജ്‌വാദി പാര്‍ട്ടി രംഗത്തെത്തി.
