തൃശൂർ: മെഡിക്കൽ വിദ്യാർഥികളായ നവീൻ റസാഖ്-ജാനകി ഓംകുമാർ കൂട്ടുകെട്ട് ചുവടുവച്ച വൈറൽ ഡാൻസിന് എതിരായി ഉയർന്നുവന്ന ‘ലൗ ജിഹാദ്’ ആരോപണം തീവ്ര ഹിന്ദുത്വ ഗ്രൂപുകളിൽ ചർച്ചയാകുമ്പോഴാണ് ബിജെപി വക്താവ് സന്ദീപ് ജി വാര്യർ അഭിനന്ദനവുമായി എത്തിയത്.
‘സംഗതി പൊരിച്ചൂട്ടാ’; ജാനകിയെയും നവീനെയും അഭിനന്ദിച്ച് സന്ദീപ് ജി വാര്യർ കുറിച്ചു. കലാലയങ്ങളെ മനോഹരങ്ങളാക്കുന്നത് കലകളാണ്. ജാനകി ഓംകുമാറിനും നവീന് റസാഖിനും അഭിനന്ദനങ്ങള്. കൂടുതല് മികച്ച പ്രകടനങ്ങളുമായ് മുന്നോട്ട് വരാന് കഴിയട്ടെ ഇരുവര്ക്കും. തൃശൂർ മെഡിക്കൽ കോളേജിലെ ഗഡീസ് ആയോണ്ട് പറയാണ്; സംഗതി പൊരിച്ചൂട്ടാ .. സന്ദീപ് ഫേസ്ബുക്കിൽ കുറിച്ചു.
‘റാ റാ റാസ്പുടിൻ… ലവർ ഓഫ് ദ് റഷ്യൻ ക്വീൻ…’’ എന്ന ബോണി എം ബാൻഡിന്റെ പാട്ടിനൊത്തായിരുന്നു ഇരുവരുടെയും ഡാൻസ്. ഇൻസ്റ്റാഗ്രാം റീൽസിൽ നവീൻ പങ്കുവച്ച വിഡിയോയാണ് തരംഗം തീർത്തത്. മാനന്തവാടി സ്വദേശി റസാഖിന്റെയും ദിൽഷാദിന്റെയും മകനാണ് നവീൻ റസാഖ്. തിരുവനന്തപുരം രാജീവ് ഗാന്ധി സെന്ററിലെ ശാസ്ത്രജ്ഞൻ ഡോക്ടർ ഓം കുമാറിന്റെയും ചൈൽഡ് ഡവലപ്മെന്റ് സെന്ററിലെ ഡോക്ടർ മായാദേവിയുടെയും മകളാണ് ജാനകി.
പല തവണ ആവര്ത്തിച്ച് കണ്ടിരുന്നുവെന്നും ജാനകിയുടെ എക്സ്പ്രെഷൻസ് അവരുടെ പ്രകടനത്തെ മറ്റൊരു തലത്തിലേക്ക് എത്തിച്ചുവെന്നും സന്ദീപ് വാര്യർ കുറിച്ചു. വയനാട് കളക്ടർ അടക്കമുള്ള നിരവധി പ്രമുഖരും ഈ വീഡിയോ അവരവരുടെ സമൂഹ മാദ്ധ്യമ പേജുകളിലൂടെ ഷെയര് ചെയ്തിട്ടുണ്ട്. തൃശൂര് മെഡിക്കല് കോളേജ് ആശുപത്രിയുടെ മുകള്നിലയിലെ വരാന്തയിലായിരുന്നു ഒഴിവ് സമയത്തെ ഇരുവരും ഡാന്സ്.
Related News: നവീൻ റസാഖ്-ജാനകി ഓംകുമാർ വൈറൽ ഡാൻസ്; പിന്തുണയുമായി മെഡിക്കൽ സ്റ്റുഡന്റ്സ് നെറ്റ്വർക്ക്