എറണാകുളം: നെടുങ്കണ്ടം സ്വദേശി രാജ് കുമാറിന്റെ കസ്റ്റഡി മരണവുമായി ബന്ധപ്പെട്ട് മുന്‍ എസ് പി കെ.ബി വേണുഗോപാലിനെതിരെ വകുപ്പുതല അന്വേഷണത്തിന് ഉത്തരവ്. എറണാകുളം റേഞ്ച് ഡിഐജിയുടെ റിപ്പോര്‍ട്ടിനെ തുടര്‍ന്നാണ് അന്വേഷണത്തിന് ഉത്തരവിട്ടത്. അന്വേഷണത്തിനായി 2 അംഗ ഐപിഎസ് സമിതിയെ നിയോഗിച്ചു . ടിങ്കു ബിസ്വാളിനും സിഎ ലതക്കുമാണ് അന്വേഷണ ചുമതല.
കേസില്‍ വേണുഗോപാലിന് വീഴ്‌ച പറ്റിയെന്ന് ചൂണ്ടിക്കാട്ടി നേരത്തെ ഡിഐജി റിപ്പോര്‍ട്ട് സമര്‍പ്പിച്ചിരുന്നു. കസ്റ്റഡി മരണവുമായി ബന്ധപ്പെട്ട് വേണുഗോപാല്‍ നല്‍കിയ വിശദീകരണം തൃപ്തമല്ലാത്ത സാഹചര്യത്തിലാണ് അന്വേഷണത്തിന് ഉത്തരവിട്ടത്.
കഴിഞ്ഞ ജൂണ്‍ 21നാണ് നെടുങ്കണ്ടം സ്വദേശി രാജ്കുമാര്‍ പീരുമേട് ജയിലില്‍ വെച്ച് മരിച്ചത്. സംഭവത്തില്‍ എസ്‌ഐ അടക്കം 4 പൊലീസുകാരെ അറസ്റ്റ് ചെയ്തിരുന്നു.
