മലപ്പുറം: പുതിയ കാബിനറ്റിൽ പ്രവാസ കാര്യത്തിന് മാത്രമായി പ്രത്യേക മന്ത്രിയെ ചുമതലപ്പെടുത്തണമെന്ന് ഇന്ത്യൻ കൾച്ചറൽ ഫൗണ്ടേഷൻ ഗൾഫ് കൗൺസിൽ മുഖ്യമന്ത്രിയോടും ഭരണകക്ഷി നേതാക്കളോടും കത്തിലൂടെ അഭ്യർഥിച്ചു.
കേരളത്തിന്റെ സാമൂഹികവും സാമ്പത്തികവുമായ പുരോഗതിയിൽ പ്രവാസി മലയാളികൾ വഹിക്കുന്ന പങ്കാളിത്തം സ്ഥിതിവിവര കണക്കുകളുടെ അടിസ്ഥാനത്തിൽ സ്ഥാപിക്കപ്പെട്ടിട്ടുള്ള വസ്തുതയാണ്. മുപ്പത് ലക്ഷത്തിലധികം ആളുകളാണ് കേരളത്തിൽ നിന്ന് പുറത്തുപോയി ജീവനോപാധി തേടുന്നത്.
കേരള ജനസംഖ്യയുടെ നല്ലൊരുശതമാനം വരുന്ന ഈ വിഭാഗവുമായി ബന്ധപ്പെട്ട വിഷയങ്ങൾ സവിശേഷ ശ്രദ്ധ നൽകേണ്ട കാര്യമാണ്. വിവിധ സാഹചര്യങ്ങളാൽ അതിജീവനം, തിരിച്ചുവരവ്, പുനരധിവാസം തുടങ്ങിയ പ്രശ്നങ്ങളെയും സ്ഥിരമായി അഭിമുഖീകരിക്കുന്ന ഒരുവിഭാഗമാണ് പ്രവാസികൾ. കോവിഡ് കാലത്തെ ഈ ഒരു വർഷത്തിനിടെ മാത്രം എട്ട് ലക്ഷത്തോളം പ്രവാസികൾ തൊഴിൽ നഷ്ടപ്പെട്ട് നാട്ടിലേക്ക് തിരിച്ചെത്തിയെന്നാണ് ചില കണക്കുകൾ പറയുന്നത്.
അതോടൊപ്പം തന്നെ പുതിയ ദേശങ്ങളിലേക്കു പ്രവാസം പടരുന്ന സാഹചര്യവുമുണ്ട്. ബഹുമുഖ പ്രതിഭാത്വത്തിന്റെ നിറവുള്ള സമൂഹം കൂടിയാണ് പ്രവാസികൾ. അവരെ കേരളത്തിന്റെ വികസന മുന്നേറ്റത്തിൽ പങ്കാളികളാക്കി വേണം ‘റീബിൽഡ് കേരള’ പദ്ധതിയുടെ മുന്നോട്ട് പോക്ക്. ഈ വിഷയങ്ങളിൽ സവിശേഷ ശ്രദ്ധ നൽകുന്നതിന് പുതിയ കാബിനറ്റിൽ പ്രത്യേകമായി മന്ത്രിയെ ചുമതലപ്പെടുത്തണമെന്ന് കത്തിൽ ഇന്ത്യൻ കൾച്ചറൽ ഫൗണ്ടേഷൻ ആവശ്യപ്പെട്ടു.
Most Read: കോവിഡ് ബാധിച്ചാൽ എന്റെ ഉപദേശം കേട്ടാൽ മതിയെന്ന് രാംദേവ്; പരാതിയുമായി ഐഎംഎ