കൊല്ലം: പേവിഷബാധയേറ്റ് ചികിൽസയിൽ ആയിരുന്ന ഒമ്പത് വയസുകാരൻ മരിച്ചു. കൊല്ലം ശാസ്താംകോട്ടയിലാണ് സംഭവം. പോരുവഴി നടുവിലേമുറി ജിതിൻ ഭവനത്തിൽ ഫൈസലാണ് മരിച്ചത്. കഴിഞ്ഞ മാർച്ചിൽ കുട്ടിക്ക് നായയുടെ നഖം കൊണ്ട് പോറലേറ്റിരുന്നു. നായയുടെ കടിയേറ്റ കുട്ടിയുടെ മുത്തച്ഛനും മുത്തശ്ശിയും മെഡിക്കൽ കോളേജിൽ പ്രവേശിപ്പിച്ചു.
മാർച്ചിൽ കുട്ടിക്ക് നായയുടെ നഖം കൊണ്ട് പോറലേറ്റിരുന്നെങ്കിലും ആശുപത്രിയിൽ കൊണ്ടുപോവുകയോ പ്രതിരോധ കുത്തിവെപ്പ് എടുക്കുകയോ ചെയ്തിരുന്നില്ല. പിന്നീട് രോഗലക്ഷണം പ്രകടിപ്പിച്ചതിനെ തുടർന്ന് ആശുപത്രിയിൽ പ്രവേശിപ്പിക്കുകയായിരുന്നു. പിന്നീട് ആരോഗ്യനില വഷളായതിനെ തുടർന്ന് കുട്ടിയെ ഒരാഴ്ച മുമ്പാണ് തിരുവനന്തപുരം എസ്എടി ആശുപത്രിയിൽ തീവ്രപരിചരണ വിഭാഗത്തിൽ പ്രവേശിപ്പിച്ചത്.
എന്നാൽ, ഇന്നലെ പുലർച്ചയോടെ കുട്ടി മരണത്തിന് കീഴടങ്ങുകയായിരുന്നു. കുട്ടിയുടെ മുത്തച്ഛൻ ചെല്ലപ്പൻ, മുത്തശ്ശി ലീല എന്നിവരാണ് നായയുടെ കടിയേറ്റ് ചികിൽസയിൽ ഉള്ളത്. ചെല്ലപ്പൻ തീവ്രപരിചരണ വിഭാഗത്തിലേക്ക് മാറ്റി. നാലാം ക്ളാസ് വിദ്യാർഥിയാണ് മരിച്ച ഫൈസൽ. ഏഴാം മെയിൽ സെന്റ് തോമസ് സ്കൂളിലെ വിദ്യാർഥിയായിരുന്നു.
Most Read: തിരുവമ്പാടിയിൽ മൃതദേഹ അവശിഷ്ടങ്ങൾ കണ്ടെത്തി; സമീപത്ത് തലയോട്ടിയും