മലപ്പുറം : ജില്ലയിലെ വള്ളിക്കുന്ന് മേഖലയിലുള്ള നിറംകൈതക്കോട്ട ക്ഷേത്രം തീര്‍ഥാടന ടൂറിസം പദ്ധതിയില്‍ ഉള്‍പ്പെടുത്താന്‍ തീരുമാനിച്ചതായി ബജറ്റ് രേഖയില്‍ വ്യക്‌തമാക്കി. നൂറ്റാണ്ടുകള്‍ പഴക്കമുള്ള ഈ ക്ഷേത്രം അതിന്റെ എല്ലാ പ്രൗഢിയോടും കൂടി ഇന്നും നിലനില്‍ക്കുന്നുണ്ട്. പരപ്പനാട് രാജവംശത്തിന്റെ ബാക്കിപത്രമാണ് നിറംകൈതക്കോട്ട ക്ഷേത്രം.
അയ്യപ്പനെ ആരാധനാ മൂര്‍ത്തിയാക്കിയ ഈ ക്ഷേത്രത്തിന്റെ കവാടത്തിന് സമീപത്തായി നിലകൊള്ളുന്ന രണ്ട് നിലയിലുള്ള പത്തായപ്പുര, പാട്ടുപുര, പാട്ടുകൊട്ടില്‍, കാര്യവിചാര മണ്ഡപം, രാമായണം ബാലകാണ്ഡം ദാരുശില്‍പ്പം എന്നിവ ഇപ്പോഴും പഴമയുടെ സൗന്ദര്യവും, പ്രൗഢിയും വിളിച്ചോതുന്നവയാണ്.
48 ഏക്കറിനുള്ളിലാണ് ക്ഷേത്രവും അനുബന്ധ കെട്ടിടങ്ങളും നിലകൊള്ളുന്നത്. ഇവയുടെ സംരക്ഷണം ആവശ്യപ്പെട്ട് മന്ത്രി കടന്നപ്പള്ളി രാമചന്ദ്രന് നേരത്തെ നിവേദനം സമര്‍പ്പിച്ചിരുന്നു. ക്ഷേത്രത്തിലെ ചെമ്പോല മേഞ്ഞ പത്തായപ്പുര തകര്‍ന്നിട്ടുണ്ട്. ഇതൊക്കെ കണക്കിലെടുത്താണ് സംരക്ഷണം നല്‍കണമെന്ന ആവശ്യവുമായി നേരത്തെ മന്ത്രിക്ക് നിവേദനം നല്‍കിയത്.
Read also : വിഎച്ച്പി റാലിക്കിടെ അക്രമം; 40 പേര്‍ അറസ്‌റ്റില്‍
