മലപ്പുറം : ജില്ലയിൽ ഓൺലൈൻ ക്ളാസിന്റെ പേരിൽ അധ്യാപകൻ ചമഞ്ഞ് 12 വയസുകാരിയോട് അശ്ളീല സംഭാഷണം. സ്‌കൂളിലെ അധ്യാപകനാണെന്ന് പരിചയപ്പെടുത്തിയാണ് ക്ളാസ് ആരംഭിച്ചത്. എന്നാൽ സംസാരത്തിൽ അസ്വാഭാവികത തോന്നിയ വീട്ടുകാർ സ്‌കൂളുമായി ബന്ധപ്പെട്ടപ്പോൾ ഇത്തരത്തിൽ ക്ളാസ് നടക്കുന്നില്ലെന്ന് അറിയുകയായിരുന്നു.
തുടർന്ന് കുട്ടിയുടെ വീട്ടിലെത്തിയ അധ്യാപകർ ബന്ധുക്കളെ കൂട്ടി പോലീസിൽ പരാതി നൽകി. പരാതിയുടെ അടിസ്‌ഥാനത്തിൽ ചങ്ങരംകുളം പോലീസ് കേസെടുത്തിട്ടുണ്ട്. ഈ പ്രദേശത്തെ മറ്റ് സ്‌കൂളിലെ കുട്ടികളും ഇത്തരത്തിൽ തട്ടിപ്പിന് ഇരയായതായി വ്യക്‌തമായിട്ടുണ്ട്.
അധ്യാപകൻ ചമഞ്ഞ് ഇത്തരത്തിൽ കുട്ടികളോട് മോശമായി പെരുമാറുന്ന വ്യാജനെ ഉടൻ തന്നെ കണ്ടുപിടിക്കണം എന്നാവശ്യപ്പെട്ട് ബാലാവകാശ കമ്മിഷൻ, എസ്‌പി, വനിത ശിശുക്ഷേമ മന്ത്രി എന്നിവർക്ക് ബന്ധുക്കൾ പരാതി നൽകി.
Read also : പ്രവാസിയെ തട്ടിക്കൊണ്ട് പോയ കേസ്; അന്വേഷണം കൊടി സുനിയിലേക്ക്; തെളിവുകൾ പുറത്ത്
