കൊച്ചി : കളമശ്ശേരി മെഡിക്കല് കോളേജില് കോവിഡ് രോഗി മരിച്ച സംഭവത്തില് ജീവനക്കാര്ക്ക് എതിരെ ഉയര്ന്ന ആരോപണത്തെ തുടര്ന്നുള്ള പ്രാഥമിക അന്വേഷണം പൂര്ത്തിയായി. അന്വേഷണ റിപ്പോര്ട്ട് രണ്ട് ദിവസത്തിനുള്ളില് സിറ്റി പോലീസ് കമ്മീഷണര്ക്ക് കൈമാറുമെന്ന് അന്വേഷണ സംഘം അറിയിച്ചു. കേസില് തുടര്നടപടികള് റിപ്പോര്ട്ടിന്റെ അടിസ്ഥാനത്തില് ആയിരിക്കും നടക്കുക.
കളമശ്ശേരി മെഡിക്കല് കോളേജില് കോവിഡ് ബാധിച്ചു ചികില്സയില് കഴിഞ്ഞിരുന്ന ഹാരിസ് ഓക്സിജന് ലഭിക്കാതെ മരിച്ച സംഭവം വളരെയധികം വിവാദങ്ങള്ക്ക് തിരി കൊളുത്തിയിരുന്നു. മരണത്തില് ദുരൂഹത ഉണ്ടെന്ന് ബന്ധുക്കള് പോലീസിനെ അറിയിച്ചതിന് പിന്നാലെയാണ് മെഡിക്കല് കോളേജിലെ നഴ്സിംഗ് ഓഫീസര് ജലജ ദേവിയുടെ ശബ്ദ സന്ദേശം പുറത്തെത്തിയത്. ശബ്ദ സന്ദേശത്തില് ജീവനക്കാരുടെ അനാസ്ഥ മൂലമാണ് ഹാരിസ് മരിച്ചതെന്ന് ജലജ ദേവി വ്യക്തമാക്കിയിരുന്നു. ഇതിനെ തുടര്ന്ന് സംഭവം വിവാദമായതോടെ ആരോഗ്യവകുപ്പ് മന്ത്രി കെകെ ശൈലജ ഇടപെട്ട് അന്വേഷണത്തിന് ഉത്തരവിടുകയായിരുന്നു. അന്വേഷണത്തിന്റെ ഭാഗമായി ബന്ധുക്കളില് നിന്നും മെഡിക്കല് കോളേജ് ജീവനക്കാരില് നിന്നും അന്വേഷണ സംഘം മൊഴിയെടുത്തു.
Read also : 16000 അടി ഉയരം; തണുത്തുറഞ്ഞ കാലാവസ്ഥയെ അതിജീവിച്ച് ജവാന് ശസ്ത്രക്രിയ; വിജയകരം