എടക്കാട്: റോഡരികിലൂടെ നടന്നുപോകവേ സ്കൂട്ടറിലെത്തി സ്ത്രീയുടെ സ്വർണമാല പൊട്ടിച്ച സംഭവത്തിൽ രണ്ടുപേർ റിമാൻഡിൽ. പോലീസിന്റെ പിടിയിലായ തയ്യിൽ പുതിയ പുരയിൽ ഷിജിൽ (24), ന്യൂ മാഹി സ്വദേശി രാജേഷ് (30) എന്നിവരെയാണ് റിമാൻഡ് ചെയ്തത്. സംഭവം ആസൂത്രിതമായ കവർച്ചയാണെന്ന് പോലീസ് പറഞ്ഞു.
വളപ്പട്ടണം സ്വദേശിനി സരസ്വതിയുടെ 2 പവൻ തൂക്കം വരുന്ന സ്വർണമാലയാണ് സ്കൂട്ടറിലെത്തിയവർ തട്ടിയെടുത്തത്. നടാൽ റെയിൽവേ ഗേറ്റിനടുത്ത് വെച്ച് കഴിഞ്ഞ ദിവസമാണ് സംഭവം നടന്നത്. പ്രതികൾ മാലപൊട്ടിച്ച് രക്ഷപെടാൻ ശ്രമിക്കവേ സരസ്വതി ബഹളം വെച്ചതിനെ തുടർന്ന് നാട്ടുകാർ വാഹനത്തിൽ പിന്തുടർന്ന് പ്രതികളെ പിടികൂടി പോലീസിൽ ഏൽപ്പിക്കുകയായിരുന്നു.
പ്രതികളിൽ നിന്നും സ്വർണമാല കണ്ടെടുത്തിട്ടുണ്ട്. ഇവരിൽ നിന്നും മുളകുപൊടി അടക്കമുള്ള വസ്തുക്കളും കണ്ടെടുത്തിരുന്നു. അതേസമയം പിടിവലിക്കിടെ റോഡിൽ വീണ സരസ്വതി ചികിൽസയിലാണ്.
Read also: കരിപ്പൂരിൽ 98 ലക്ഷം രൂപയുടെ സ്വർണ്ണം പിടികൂടി; 3 പേർ അറസ്റ്റിൽ