തിരുവനന്തപുരം : ഉത്രാവധക്കേസില്‍ അറസ്റ്റിലായ ഭര്‍ത്താവ് സൂരജിന്റെ അമ്മയെയും സഹോദരിയെയും കസ്റ്റഡിയില്‍ വാങ്ങുമെന്ന് അന്വേഷണ സംഘം. കൊലപാതകത്തിന്റെ ഗൂഢാലോചനയില്‍ ഭര്‍ത്താവ് സൂരജിന്റെ അമ്മയ്ക്കും സഹോദരിക്കും പങ്കുണ്ടോ എന്ന് പരിശോധിക്കാന്‍ വേണ്ടിയാണ് കസ്റ്റഡിയിലെടുക്കുന്നത്. നേരത്തെ തന്നെ അറസ്റ്റ് ചെയ്തിരുന്ന സൂരജിന്റെ അച്ഛന്‍ സുരേന്ദ്രന്‍ ഹൈക്കോടതിയില്‍ നിന്നും ജാമ്യം നേടിയിരുന്നു.
കൊലപാതകത്തിന്റെ ഗൂഢാലോചനയില്‍ സൂരജിന്റെ അമ്മ രേണുകയ്ക്കും സഹോദരി സൂര്യയ്ക്കും പങ്കുണ്ടെന്ന് ഉത്രയുടെ വീട്ടുകാര്‍ ആദ്യം മുതല്‍ത്തന്നെ ആരോപിച്ചിരുന്നു. ഗാര്‍ഹികപീഡനം, തെളിവ് നശിപ്പിക്കല്‍, വിശ്വാസവഞ്ചന തുടങ്ങിയവയിലാണ് ഇവര്‍ക്കെതിരെ കേസെടുത്തിട്ടുള്ളത്. കൊലപാതകത്തിന്റെ ഗൂഢാലോചനയില്‍ ഇവര്‍ക്കുള്ള പങ്ക് കണ്ടെത്താനായാണ് ഇപ്പോള്‍ റിമാന്‍ഡില്‍ കഴിയുന്ന സൂരജിന്റെ അമ്മയെയും സഹോദരിയെയും അന്വേഷണ സംഘം കസ്റ്റഡിയില്‍ എടുക്കുന്നത്.
കൊലപാതകക്കേസില്‍ ഇപ്പോള്‍ ഉത്രയുടെ ഭര്‍ത്താവ് സൂരജ് മാത്രമാണ് പ്രതിപ്പട്ടികയില്‍ ഉള്ളത്. ഇതിന്റെ കുറ്റപത്രം പുനലൂര്‍ കോടതിയില്‍ അന്വേഷണസംഘം സമര്‍പ്പിച്ചിരുന്നു. സൂരജിന് പാമ്പിനെ നല്‍കിയ സുരേഷ് കൊലപാതകക്കേസില്‍ മാപ്പു സാക്ഷി ആയെങ്കിലും വനം വകുപ്പ് എടുത്ത കേസിന്റെ അടിസ്ഥാനത്തില്‍ ജയില്‍മോചിതനായിട്ടില്ല. വന്യജീവി സംരക്ഷണ നിയമപ്രകാരമാണ് വനംവകുപ്പ് സുരേഷിനെതിരെ കേസെടുത്തിട്ടുള്ളത്.
