ദുബായ്: മുഹമ്മദ് ബിന്‍ റാഷിദ് സ്പേസ് സെന്ററിന്റെ അടുത്ത പത്ത് വര്‍ഷത്തെ പദ്ധതിയില്‍ യുഎഇയുടെ ചാന്ദ്ര ദൗത്യവും. അറബ് ലോകത്തെ ആദ്യ ചാന്ദ്ര ദൗത്യം 2024 ല്‍ നടത്താനാണ് യുഎഇയുടെ തീരുമാനം. ഈ വിവരം ഔദ്യോഗികമായി ഉടന്‍ പ്രഖ്യാപിക്കുമെന്ന് ദുബായ് ഭരണാധികാരിയും യുഎഇ വൈസ് പ്രസിഡന്റും പ്രധാനമന്ത്രിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്‌തൂം അറിയിച്ചു.
യുഎഇ ആദ്യമായി ബഹിരാകാശത്തേക്ക് ആദ്യമായി മനുഷ്യനെ അയച്ചതിന്റെ ഒന്നാം വാര്‍ഷിക വേളയിലാണ് പുതിയ പ്രഖ്യാപനം. ഇതിനോടൊപ്പം റാഷിദ് സ്പേസ് സെന്ററിന്റെ 2021-2031 കാലയളവിലെ പദ്ധതികള്‍ വിശദീകരിക്കവേയാണ് അദ്ദേഹം ഇക്കാര്യം വ്യക്തമാക്കിയത്. രണ്ട് മാസം മുമ്പ് ഗള്‍ഫ് ലോകത്തെ ആദ്യ ചൊവ്വ പര്യവേഷണ പേടക വിക്ഷേപണം യുഎഇ വിജയകരമായി പൂര്‍ത്തിയാക്കിയിരുന്നു.
കൂടാതെ, പുതിയ സ്‌പെഷ്യലൈസ്‌ഡ്‌ സാറ്റലൈറ്റ് വികസിപ്പിക്കാനും ആലോചനയുണ്ട്. കൂടുതല്‍ പരിശീലന കേന്ദ്രങ്ങളും അക്കാദമികളും സ്ഥാപിക്കും. ഇമറാത്തി യുവജനതയെ ശാസ്ത്ര ലോകത്തേക്ക് കൂടുതല്‍ ആകര്‍ഷിക്കുന്നതിന് ഭാഗമായാണിത്. ഇതിനു വേണ്ടി പ്രത്യേക വിദ്യാഭ്യാസ പരിപാടികളും നടത്തുമെന്ന് അദ്ദേഹം പറഞ്ഞു. അന്താരാഷ്ട്ര സ്പേസ് ഏജന്‍സികളുമായി കൂടുതല്‍ സഹകരണം ഉറപ്പാക്കാന്‍ വേണ്ട നടപടികളും സ്വീകരിക്കുമെന്ന് ഷെയ്ഖ് മുഹമ്മദ് വ്യക്തമാക്കി.
