ചെന്നൈ: കേന്ദ്ര ആഭ്യന്തരമന്ത്രി അമിത് ഷാ ഇന്ന് തമിഴ്‌നാട്ടില്‍ പ്രചാരണം നടത്തും. രാവിലെ 10 മണിക്ക് ബിജെപി സ്‌ഥാനാർഥി ഖുശ്ബു സുന്ദറിന്റെ പ്രചാരണ പരിപാടിയില്‍ അമിത് ഷാ പങ്കെടുക്കും. ചെന്നൈ തൗസന്‍ഡ് ലൈറ്റ്‌സ് മണ്ഡലത്തിൽ നിന്നാണ് ഖുശ്ബു ജനവിധി തേടുന്നത്.
അതിനിടെ സംസ്‌ഥാനത്ത് തുടര്‍ച്ചയായി പ്രതിപക്ഷ പാർട്ടി നേതാക്കൾക്ക് എതിരെ നടക്കുന്ന ആദായനികുതി വകുപ്പിന്റെ റെയ്‌ഡ് പ്രതിഷേധത്തിന് ഇടയാക്കി. നടപടി രാഷ്‌ട്രീയ പ്രേരിതമാണെന്നാണ് ആരോപണം ഉയരുന്നത്.
തമിഴ്‌നാട് പ്രതിപക്ഷ നേതാവ് സ്‌റ്റാലിന്റെ മകളുടെ വീട്ടില്‍ 10 മണിക്കൂര്‍ നീണ്ട റെയ്‍ഡില്‍ ആദായ നികുതി വകുപ്പിന് അനധികൃതമായി ഒന്നും കണ്ടെത്താന്‍ സാധിച്ചില്ല. ശബരീശന്റെ വസതിയിൽ നിന്ന് 1,36,000 രൂപ പിടിച്ചെടുത്തിരുന്നു. എന്നാൽ കൃത്യമായ രേഖകൾ ഹാജരാക്കിയതോടെ ഈ തുക തിരികെ നൽകി.
എന്നാൽ ഇത്തരം ഭീഷണികൾ തന്നോട് വേണ്ടെന്നും അടിയന്തരാവസ്‌ഥ അടക്കം ഇതിലും വലുത് അനുഭവിച്ചിട്ടുണ്ടെന്നും തന്നെ ഭയപ്പെടുത്താൻ ശ്രമിക്കേണ്ട എന്നുമായിരുന്നു സ്‌റ്റാലിന്റെ പ്രതികരണം. ഭീഷണിക്ക് വഴങ്ങി മോദിയുടെ അടിമകൾ ആവാൻ ഉദ്ദേശമില്ലെന്നും സ്‌റ്റാലിൻ കൂട്ടിച്ചേർത്തു.
Read also: പെരുമാറ്റചട്ടം ലംഘിച്ചു; ബിജെപി നേതാവ് ഹിമന്ത ബിശ്വ ശര്‍മക്കെതിരെ നടപടി
