തിരുവനന്തപുരം: ഹയർസെക്കണ്ടറി, വൊക്കേഷണൽ ഹയർസെക്കണ്ടറി ഒന്നാം വർഷ പരീക്ഷാ ടൈം ടേബിൾ പുതുക്കി നിശ്‌ചയിച്ചു. വിദ്യാഭ്യാസ മന്ത്രി വി ശിവൻകുട്ടി തന്റെ ഔദ്യോഗിക ഫേസ്‌ബുക്ക് പേജിലൂടെയാണ് വിവരം അറിയിച്ചത്.
വിദ്യാർഥികൾ, അധ്യാപകർ, രക്ഷിതാക്കൾ എന്നിവരുടെ ആവശ്യങ്ങൾ പരിഗണിച്ചുകൊണ്ടാണ് പുതിയ തീരുമാനം. പരീക്ഷകൾക്കുള്ള ഇടവേള വർധിപ്പിച്ചുകൊണ്ട് തയ്യാറെടുപ്പിന് കൂടുതൽ സമയം ലഭിക്കുന്ന തരത്തിൽ പരീക്ഷ ക്രമീകരിക്കാൻ നിർദ്ദേശം നൽകിയത് പ്രകാരമാണ് ടൈംടേബിൾ പുതുക്കിയതെന്നും മന്ത്രി പറഞ്ഞു.
സെപ്റ്റംബർ 6 മുതൽ 27 വരെയാണ് ഹയർസെക്കണ്ടറി പരീക്ഷ നടക്കുക. വൊക്കേഷണൽ ഹയർസെക്കണ്ടറി പരീക്ഷ സെപ്റ്റംബർ ഏഴ് മുതൽ 27 വരെയും നടക്കും. ഒരു പരീക്ഷക്ക് കഴിഞ്ഞാൽ രണ്ടോ മൂന്നോ ദിവസത്തെ ഇടവേളക്ക് ശേഷം അടുത്ത പരീക്ഷ എന്ന നിലയിലാണ് പരീക്ഷകൾ ക്രമീകരിച്ചിരിക്കുന്നത്. ചില വിഷയങ്ങളിലെ പരീക്ഷകൾ തമ്മിൽ ഇതിലേറെ ദിവസങ്ങളുടെ ഇടവേളയുണ്ട്.
കുട്ടികൾക്ക് പരീക്ഷാ ദിനങ്ങൾക്കിടയിൽ പഠിക്കാനുള്ള സമയം കുറയും എന്ന പരാതിക്ക് ഇതോടെ പരിഹാരമാകുമെന്നാണ് കരുതുന്നതെന്നും മന്ത്രി കൂട്ടിച്ചേർത്തു.
Also Read: ഒ പനീർശെൽവം ഉൾപ്പടെയുള്ള എഐഎഡിഎംകെ എംഎല്‍എമാര്‍ അറസ്‌റ്റിൽ
