കണ്ണൂർ: ജില്ലയിൽ രജിസ്റ്റർ ചെയ്ത റവന്യു, പൊലീസ്, തദ്ദേശ സ്വയംഭരണം, മുനിസിപ്പൽ കോർപറേഷൻ സ്ഥാപനങ്ങളിലെ ജീവനക്കാർക്കും പോളിംഗ് ഉദ്യോഗസ്ഥർക്കുമുളള കോവിഡ് വാക്സിനേഷൻ തിങ്കളാഴ്ച മുതൽ ആരംഭിക്കും. ഇവർ തൊട്ടടുത്ത കേന്ദ്രങ്ങളിൽനിന്ന് വാക്സിൻ സ്വീകരിക്കണം. ആദ്യഘട്ടം 60 വയസിന് മുകളിൽ പ്രായമുള്ളവർക്ക് ഓൺലൈൻ വഴി രജിസ്റ്റർ ചെയ്ത് വാക്സിൻ സ്വീകരിക്കാം.
അടുത്ത ഘട്ടം പഞ്ചായത്തുകൾ കേന്ദ്രീകരിച്ച് ആരോഗ്യ സ്ഥാപനങ്ങളിൽ നിന്നും 60 വയസിന് മുകളിൽ പ്രായമുള്ളവർക്ക് വാക്സിൻ നൽകും. വാക്സിനേഷൻ കേന്ദ്രത്തിൽ പോകുന്നവർ ആധാർ കാർഡോ, ഫോട്ടോ പതിപ്പിച്ച അംഗീകൃത തിരിച്ചറിയൽ രേഖയോ കരുതണം.
45 വയസ് മുതൽ 59 വയസ് വരെയുള്ളവരാണെങ്കിൽ രജിസ്റ്റർ ചെയ്ത മെഡിക്കൽ പ്രാക്റ്റീഷണർ ഒപ്പിട്ട കോമോർബിഡിറ്റി സർട്ടിഫിക്കറ്റ് വാക്സിനേഷൻ കേന്ദ്രത്തിൽ സമർപ്പിക്കണം. സ്പോട്ട് രജിസ്ട്രേഷൻ സൗകര്യം പ്രാബല്യത്തിൽ വരുമ്പോൾ പൊതുജനങ്ങൾക്ക് അറിയിപ്പ് ലഭ്യമാക്കുമെന്ന് ജില്ലാ മെഡിക്കൽ ഓഫീസർ അറിയിച്ചു.
Read Also: എസ്എസ്എല്സി, ഹയർ സെക്കൻഡറി മോഡൽ പരീക്ഷകൾ ഇന്നാരംഭിക്കും