ഡെല്‍ഹി: കോവിഡ് 19നുള്ള വാക്‌സിന്‍ ഡിസംബറോടെ തയാറാകുമെന്ന് പൂനെയിലെ സെറം ഇന്‍സ്‌റ്റിറ്റ്യൂട്ട് ഓഫ് ഇന്ത്യ. സെറം ഇന്‍സ്‌റ്റിറ്റ്യൂട്ട് സിഇഒ അഡാര്‍ പൂനാവാലയാണ് ഇക്കാര്യം അറിയിച്ചത്. ന്യൂസ് 18നോടാണ് സെറം സിഇഒ ഇക്കാര്യം വ്യക്‌തമാക്കിയത്.
ഓക്‌സ്‌ഫോഡ് യൂണിവേഴ്സിറ്റിയും ബ്രിട്ടീഷ് കമ്പനി ആസ്ട്ര സെനകയും ചേര്‍ന്ന് വികസിപ്പിച്ച കോവിഷീല്‍ഡ് എന്ന വാക്‌സിനാണ് സെറം ഇന്‍സ്‌റ്റിറ്റ്യൂട്ട് ഇന്ത്യയില്‍ നിര്‍മ്മിക്കുന്നത്. സെറം ഇന്‍സ്‌റ്റിറ്റ്യൂട്ടിന് ഫേസ് 3 ക്ലിനിക്കല്‍ ട്രയലിന് നേരത്തെ അംഗീകാരം നല്‍കിയിരുന്നു. അതേസമയം, യുകെയിലെ ട്രയലുകളും ഡ്രഗ് കണ്‍ട്രോളര്‍ ജനറല്‍ ഓഫ് ഇന്ത്യയുടെ അനുമതിയും അനുസരിച്ചിരിക്കും ഇതെന്നും അഡാര്‍ പൂനാവാല പറഞ്ഞു.
Also Read: ഡെല്‍ഹി വായു മലിനീകരണം; പുതിയ കമ്മിറ്റിക്കായി കേന്ദ്രം ഓര്‍ഡിനന്‍സ് ഇറക്കി
ഇന്ത്യയില്‍ നിര്‍മിക്കുന്ന മറ്റൊരു വാക്‌സിനായ കോവാക്‌സിന്‍ 2021 ജൂണിലേ വ്യാപകമായി ലഭ്യമാവുകയുള്ളൂ. ഹൈദരാബാദിലെ ഭാരത് ബയോടെക്ക് ആണ് കോവാക്‌സിന്‍ നിര്‍മ്മിക്കുന്നത്. ഇവര്‍ക്ക് ഇനിയും ഫേസ് 3 ക്ലിനിക്കല്‍ ട്രയലിനുള്ള അനുമതി ലഭിക്കേണ്ടതുണ്ട്.
