ന്യൂഡെൽഹി: സൈഡസ് കാഡിലയുടെ കോവിഡ് പ്രതിരോധ വാക്‌സിൻ സൈകോവ്-ഡി ഉടൻ തന്നെ വിപണിയിൽ എത്തുമെന്ന് വ്യക്‌തമാക്കി കേന്ദ്ര ആരോഗ്യ മന്ത്രാലയം. സൈകോവ്-ഡി വാക്‌സിന് മൂന്ന് ഡോസ് ആയതിനാൽ തന്നെ ഇതിന്റെ വിലയിൽ വ്യത്യാസം ഉണ്ടാകുമെന്നും കേന്ദ്രം അറിയിച്ചു.
അഹമ്മദാബാദ് ആസ്‌ഥാനമായ സൈഡസ് കാഡില കമ്പനി വികസിപ്പിച്ച സൈകോവ്-ഡി വാക്‌സിൻ 12 വയസിന് മുകളിലുള്ളവർക്കും നൽകാമെന്ന വിദഗ്‌ധ സമിതി ശുപാർശ ഡ്രഗ്സ് കൺട്രോളർ ജനറൽ ഓഫ് ഇന്ത്യ അംഗീകരിച്ചിരുന്നു. ഇന്ത്യയിൽ തന്നെ വികസിപ്പിച്ച രണ്ടാമത്തെ വാക്‌സിനാണ് സൈകോവ്-ഡി. കൂടാതെ രാജ്യത്ത് അനുമതി ലഭിക്കുന്ന ആറാമത്തെ കോവിഡ് വാക്‌സിനാണിത്.
ആളുകളിൽ കുത്തി വെക്കാതെ വിതരണം ചെയ്യുന്ന ‘നീഡിൽ ഫ്രീ വാക്‌സിൻ’ എന്ന പ്രത്യേകത കൂടി സൈകോവ്-ഡി വാക്‌സിനുണ്ട്. ഫാർമജെറ്റ് എന്ന ഉപകരണം ഉപയോഗിച്ച് ഉയർന്ന സമ്മർദ്ദത്തിൽ വാക്‌സിൻ ഉള്ളിലേക്ക് എത്തുന്ന സാങ്കേതിക വിദ്യയാണ് ഇതിൽ ഉപയോഗിക്കുന്നത്. കൂടാതെ 66.66 ശതമാനം ഫലപ്രാപ്‌തിയാണ് ഇതിന് കണക്കാക്കുന്നത്.
Read also: നാളെ മുതൽ സംസ്‌ഥാനത്ത് ശക്‌തമായ മഴയ്‌ക്ക് സാധ്യത; കാലാവസ്‌ഥാ വകുപ്പ്
