മലപ്പുറം: നായാട്ടിനിടെ യുവാവിന് വെടിയേറ്റ സംഭവത്തിൽ രണ്ടു പേർ പിടിയിൽ. മങ്കട കൂട്ടിൽ സ്വദേശി പറമ്പത്ത് ഇബ്രാഹീം (58), മങ്കട കർക്കിടകം സ്വദേശി മേലേടത്ത് സുനീർ അലി (35) എന്നിവരെയാണ് കൊളത്തൂർ പോലീസ് അറസ്റ്റ് ചെയ്തത്. ശനിയാഴ്ച പുലർച്ചെ രണ്ട് മണിയോടെയാണ് സംഭവം.
പാങ്ങ് പെരിഞ്ചോലയിൽ ഒരുമിച്ചു നായാട്ടിനിറങ്ങിയ മൂന്ന് സുഹൃത്തുക്കളിൽ ഒരാൾക്കാണ് വെടിയേറ്റത്. മങ്കട ചേരിയം സ്വദേശി കുന്നത്ത് മുസ്തഫക്കാണ് (38) വെടിയേറ്റത്. സംഘത്തിന്റെ കൈവശം ഉണ്ടായിരുന്ന ലൈസൻസില്ലാത്ത തോക്കിൽ നിന്നാണ് വെടിയുതിർന്നത്. തലക്ക് ഗുരുതരമായി പരിക്കേറ്റ മുസ്തഫ പെരിന്തൽമണ്ണ എംഇഎസ് ആശുപത്രിയിൽ ചികിൽസയിലാണ്.
പെരിന്തൽമണ്ണ ഡിവൈഎസ്പി എം സന്തോഷ് കുമാറിന്റെ നേതൃത്വത്തിൽ കൊളത്തൂർ സിഐ എ സജിത്ത്, പെരിന്തൽമണ്ണ ഡൻസാഫ് സംഘത്തിലെ എസ്ഐ സിപി മുരളി, അന്വേഷണ ഉദ്യോഗസ്ഥരായ എൻ ടി കൃഷ്ണകുമാർ, എം മനോജ്, പ്രശാന്ത്, ദിനേശ്, പ്രഫുൽ എന്നിവരാണ് അന്വേഷണം നടത്തുന്നത്.
Most Read: ‘നമ്പർ 18 ഹോട്ടൽ’ പോക്സോ കേസ്; റോയ് വയലാട്ടിൻ ആശുപത്രിയിൽ
