ശ്രീനഗര്: കശ്മീരിലും ബിജെപി കുതിരക്കച്ചവടത്തിന് ശ്രമിക്കുന്നതായി നാഷണല് കോണ്ഫറന്സ് നേതാവും മുന് മുഖ്യമന്ത്രിയുമായ ഒമര് അബ്ദുള്ള. കശ്മീര് ജില്ലാ വികസന കൗണ്സില് തിരഞ്ഞെടുപ്പ് ഫലത്തിന് പിന്നാലെ തങ്ങളുടെ പാര്ട്ടിയില് നിന്ന് വിജയിച്ചവരെ ഭരണത്തിന്റെ സ്വാധീനം ചെലുത്തി വലയിലാക്കാന് ബിജെപിയും അപ്നി പാര്ട്ടിയും ശ്രമിക്കുകയാണെന്ന് അദ്ദേഹം ആരോപിച്ചു.
‘ഞങ്ങളുടെ പാര്ട്ടി സ്ഥാനാര്ഥിയായി മല്സരിച്ചയാളുടെ ബന്ധുവിനെ അറസ്റ്റ് ചെയ്തിട്ടുണ്ട്. പാര്ട്ടി മാറുമെന്ന് ഞങ്ങളുടെ നേതാവ് പറഞ്ഞാല് മാത്രമെ അവരെ മോചിപ്പിക്കൂ എന്നാണ് ഉദ്യോഗസ്ഥര് പറയുന്നത്’, ഒമര് പറഞ്ഞു.
ബിജെപിക്കായി കുതിരക്കച്ചവടത്തിന് ശ്രമിക്കുന്നത് ഉദ്യോഗസ്ഥര് തന്നെയെന്നും അദ്ദേഹം ആരോപിച്ചു. കശ്മീര് ജില്ലാ കൗണ്സില് തെരഞ്ഞെടുപ്പില് 110 സീറ്റ് നേടിയ ഗുപ്കാര് സഖ്യമാണ് വിജയിച്ചത്. നാഷണല് കോണ്ഫറന്സ് 67 സീറ്റും പിഡിപി 27 സീറ്റും നേടി. സഖ്യത്തിന്റെ ഭാഗമായി മല്സരിച്ച സിപിഐഎം 5 സീറ്റിലും ജയിച്ചു. 75 സീറ്റ് നേടിയ ബിജെപിയാണ് ഏറ്റവും വലിയ ഒറ്റക്കക്ഷി.