നെടുങ്കണ്ടം: കമ്പംമെട്ടിൽ 3 ലക്ഷം രൂപയുടെ കള്ളനോട്ടുമായി പിടികൂടിയ പ്രതികളെ റിമാൻഡ് ചെയ്‌തു. കോയമ്പത്തൂരും കമ്പവും കേന്ദ്രീകരിച്ച് നടത്തിയ അന്വേഷണത്തിൽ പിടിയിലായ 6 പ്രതികളെയും കസ്‌റ്റഡിയിൽ വാങ്ങി ചോദ്യം ചെയ്യാനുള്ള നടപടികൾ കമ്പംമെട്ട് പോലീസ് ആരംഭിച്ചിട്ടുണ്ട്.
കള്ളനോട്ട് വിതരണം ചെയ്യാനെത്തിയ സംഘത്തിന് സംസ്‌ഥാനന്തര ബന്ധമുണ്ടെന്നും സംശയമുണ്ട്. കേരളത്തിലും തമിഴ്‌നാട്ടിലുമായാണ് സംഘം കള്ളനോട്ട് വിതരണം ചെയ്‌തിരിക്കുന്നത്‌. ഇത് കേന്ദ്രീകരിച്ച് ജില്ലാ പോലീസ് വിശദമായ അന്വേഷണം നടത്തി വരികയാണ്.
ഞായറാഴ്‌ച രാവിലെയാണ് കമ്പംമെട്ട് ചെക്ക് പോസ്‌റ്റിൽ 3 ലക്ഷം രൂപയുടെ കള്ളനോട്ടുമായി എത്തിയ ആറംഗ സംഘത്തെ പോലീസ് പിടികൂടിയത്. റിസർവ് ബാങ്ക് പുറത്തിറക്കിയ പുതിയ 100 രൂപ നോട്ടിന്റെ 30 കെട്ടുകൾ ഇവരിൽ നിന്ന് പോലീസ് പിടിച്ചെടുത്തിരുന്നു.
ജില്ലാ പോലീസിന്റെ നർക്കോട്ടിക് സ്‌ക്വാഡും കമ്പംമെട്ട് പോലീസും ചേർന്ന് നടത്തിയ തന്ത്രപരമായ നീക്കത്തിലാണ് അന്തർ സംസ്‌ഥാന കള്ളനോട്ട് വിതരണ സംഘം കുടുങ്ങിയത്.
Also Read: കാർഷിക നിയമങ്ങൾക്ക് എതിരെ നിയമം പാസാക്കാൻ ബംഗാളും
