കണ്ണൂർ : ജില്ലയിലെ മലയോര മേഖലകളിൽ കഴിഞ്ഞ ദിവസം ഉണ്ടായ ശക്തമായ കാറ്റിലും മഴയിലും കെഎസ്ഇബിക്ക് വൻ നഷ്ടം. ഏകദേശം 10 ലക്ഷം രൂപയുടെ നഷ്ടമാണ് ചെറുപുഴ സെക്ഷൻ ഓഫീസിന് കീഴിൽ മാത്രം കണക്കാക്കുന്നത്. ചുണ്ട, വിളക്കുവട്ടം, ചൂരപ്പടവ്, പ്രാപ്പൊയിൽ, പെരുന്തടം തുടങ്ങിയ പ്രദേശങ്ങളിലാണ് ചെറുപുഴ പഞ്ചായത്തിന് കീഴിൽ കെഎസ്ഇബിക്കു നാശമുണ്ടായത്.
കൂടാതെ വിവിധ പ്രദേശങ്ങളിലെ 10ൽ അധികം വൈദ്യുത തൂണുകൾ കടപുഴകി വീഴുകയും, മരങ്ങൾ വീണ് ഭാഗികമായി നശിക്കുകയും ചെയ്തിട്ടുണ്ട്. ഇത് കൂടാതെ 115ലേറെ സ്ഥലങ്ങളിൽ ലൈൻ പൊട്ടിവീഴുകയും ചെയ്തു. കഴിഞ്ഞ ശനിയാഴ്ച വൈകുന്നേരത്തോടെയാണ് ഇവിടങ്ങളിൽ ശക്തമായ കാറ്റും മഴയും അനുഭവപ്പെട്ട് തുടങ്ങിയത്. തുടർന്ന് മഴ ശമിച്ചപ്പോൾ മുതൽ കെഎസ്ഇബി ജീവനക്കാർ ഈ പ്രദേശങ്ങളിലെ വൈദ്യുതി ബന്ധം പുനഃസ്ഥാപിക്കാനുള്ള ശ്രമത്തിലായിരുന്നു.
മിക്ക പ്രദേശങ്ങളിലും വലിയ പരിശ്രമങ്ങൾക്ക് ഒടുവിലാണ് വൈദ്യുതി തിരികെയെത്തിയത്. മലയോര മേഖല ആയതിനാൽ തന്നെ മിക്കയിടങ്ങളിലും വൈദ്യുതി ലൈനുകൾ കടന്നുപോകുന്നത് തെങ്ങ്, കമുക്, റബർ എന്നിവയുടെ തോട്ടങ്ങളിലൂടെയാണ്. അതിനാൽ തന്നെ ചെറിയ കാറ്റും മഴയും ഉണ്ടാകുന്ന സാഹചര്യങ്ങളിൽ പോലും ഇവിടെ വൈദ്യുതി ബന്ധം തടസപ്പെടുന്നത് സർവസാധാരണമാണ്.
Read also : മെമു സർവീസ് അവഗണന; ജനകീയ സമരം ആരംഭിച്ചു; മണൽ ശിൽപമൊരുക്കി പ്രതിഷേധം
