റിയാദ്: സൗദി അറേബ്യയിൽ പുതുതായി 695 പേർക്ക് കൂടി കോവിഡ് രോഗബാധ സ്‌ഥിരീകരിച്ചു. 489 പേർ രോഗമുക്‌തി നേടിയപ്പോൾ ഏഴ് കോവിഡ് മരണവും രാജ്യത്ത് റിപ്പോർട് ചെയ്‌തു.
3,93,377 പേർക്കാണ് രാജ്യത്ത് ഇതുവരെയായി വൈറസ് ബാധ സ്‌ഥിരീകരിച്ചത്‌. ഇതുവരെ 3,80,305 പേർക്ക് രോഗം ഭേദമാവുകയും 6,704 പേർ മരണപ്പെടുകയും ചെയ്‌തിട്ടുണ്ട്‌. രാജ്യത്തെ കോവിഡ് മുക്‌തി നിരക്ക് 96.8 ശതമാനവും മരണനിരക്ക് 1.7 ശതമാനവുമാണ്.
നിലവിൽ രാജ്യത്ത് 6368 പേരാണ് വിവിധ ആശുപത്രികളിലും മറ്റുമായി ചികിൽസയിൽ കഴിയുന്നത്. ഇവരിൽ 836 പേരുടെ നില ഗുരുതരമാണ്. റിയാദ് പ്രവിശ്യയിലാണ് രോഗികളുടെ എണ്ണം ക്രമാതീതമായി വർധിക്കുന്നത്.
രാജ്യത്ത് 24 മണിക്കൂറിനിടെ വിവിധ മേഖലകളിൽ റിപ്പോർട് ചെയ്‌ത പുതിയ കോവിഡ് കേസുകൾ: റിയാദ്- 289, മക്ക- 151, കിഴക്കൻ പ്രവിശ്യ- 108, മദീന- 29, അസീർ- 21, ഹായിൽ- 20, അൽഖസീം- 20, തബൂക്ക്- 19, ജിസാൻ- 17, അൽജൗഫ്- 8, വടക്കൻ അതിർത്തി മേഖല- 6, നജ്റാൻ- 4, അൽബാഹ- 3.
Read Also: കോവിഡിന്റെ രണ്ടാം തരംഗം; പ്രധാനമന്ത്രി മുഖ്യമന്ത്രിമാരുടെ യോഗം വിളിച്ചു
