തിരുവനന്തപുരം: കോവിഡ് സ്ഥിരീകരിക്കുന്ന ഉദ്യോഗസ്ഥരുടെ എണ്ണം കൂടിയതോടെ തിരുവനന്തപുരം ആറ്റിങ്ങൽ ഫയർ സ്‌റ്റേഷൻ അടച്ചിടാൻ തീരുമാനം. ഇന്ന് നാലു പേർക്കു കൂടി രോഗം സ്ഥിരീകരിച്ചു. ഇതോടെ ആകെ കോവിഡ് സ്ഥിരീകരിക്കുന്ന ഉദ്യോഗസ്ഥരുടെ എണ്ണം 13 ആയി. ഇതേത്തുടർന്നാണ് ആരോഗ്യ വകുപ്പ് ഫയർ സ്‌റ്റേഷൻ അടച്ചിടാൻ നിർദ്ദേശം നൽകിയത്.
അതേസമയം, തിരുവനന്തപുരത്ത് ഒൻപത് പോലീസുകാർക്ക് കൂടി കോവിഡ് സ്ഥിരീകരിച്ചു. പേരൂർക്കട എസ്എപി ക്യാമ്പിൽ നടന്ന പരിശോധനയിലാണ് രോഗം സ്ഥിരീകരിച്ചത്.
തിരുവനന്തപുരത്ത് ഇന്ന് 1050 പേർക്കാണ് രോഗം സ്ഥിരീകരിച്ചത്. ഇതിൽ 1024 ഉം സമ്പർക്ക രോഗികളാണ്‌. തിരുവനന്തപുരത്ത് മാത്രം 99 ശതമാനത്തിന് മുകളിലാണ് സമ്പർക്കരോഗികളുടെ എണ്ണം. രോഗികളിൽ 22 പേർ ആരോഗ്യ പ്രവർത്തകരാണ് എന്നുള്ളതും കൂടുതൽ ആശങ്കയുണ്ടാക്കുന്നു.
പ്രതിദിന കോവിഡ് കേസുകളുടെ എണ്ണം 7000 കടന്ന ദിവസമാണ് ഇന്ന്, 7006 പേർക്കാണ് ഇന്ന് സംസ്ഥാനത്ത് രോഗം സ്ഥിരീകരിച്ചത്. 3199 പേർ രോഗമുക്തി നേടി.
