ന്യൂഡെല്ഹി: കാര്ഷിക നിയമങ്ങള് പിന്വലിക്കാതെ പിന്നോട്ടില്ലെന്ന നിലപാടിലുറച്ച് കര്ഷകര്. സുപ്രീം കോടതി വിധി പരിശോധിക്കും. വിധിയുടെ പശ്ചാത്തലത്തില് ഇന്ന് രണ്ടരക്ക് പഞ്ചാബിലെ കര്ഷക സംഘടനകള് കോര് കമ്മറ്റി യോഗം ചേരുന്നുണ്ട്. നാളെ 12 മണിക്ക് 41 സംഘടനകളുടെ സെന്ട്രല് കമ്മറ്റി സിംഘുവില് ചേരാനും തീരുമാനമായിട്ടുണ്ട്.
ഡെല്ഹിയുടെ അതിര്ത്തികളില് സമരം തുടരും. റിപ്പബ്ളിക് ദിനത്തില് നടത്താനുദ്ദേശിക്കുന്ന ട്രാക്ടര് റാലിയില് നിന്ന് പിന്നോട്ടില്ലെന്നും ഭാരതീയ കിസാന് യൂണിയന് സുപ്രീം കോടതി വിധിയില് പ്രതികരിച്ചു. നിയമത്തിനെതിരെ കര്ഷക സംഘടനകള് സമരം കടുപ്പിച്ച സാഹചര്യത്തിലാണ് സുപ്രീം കോടതി ഇന്ന് കാര്ഷിക നിയമ ഭേദഗതി നടപ്പാക്കുന്നത് സ്റ്റേ ചെയ്തത്. വിവാദ നിയമങ്ങളെ കുറിച്ചും കര്ഷകര് സമരം നടത്തുന്ന സാഹചര്യവും നാലംഗ സമിതി പരിശോധിക്കും. അത് വരെ നിയമം സ്റ്റേ ചെയ്യുകയാണെന്നാണ് സുപ്രീം കോടതി പറഞ്ഞത്.