തിരുവനന്തപുരം: ശബരിമല വിഷയത്തിൽ എൽഡിഎഫും ബിജെപിയും ഒത്തുകളിച്ചെന്ന പ്രതിപക്ഷ നേതാവ് രമേശ് ചെന്നിത്തലയുടെ ആരോപണത്തിന് മറുപടിയുമായി കുമ്മനം രാജശേഖരൻ. ശബരിമലയിലെ ആചാര സംരക്ഷണത്തിനായി യുഡിഎഫ് എന്താണ് ചെയ്‌തതെന്ന്‌ ചോദിച്ച കുമ്മനം, യുഡിഎഫും എൽഡിഎഫുമാണ് ശബരിമല വിഷയത്തിൽ ഒത്തുകളിച്ചത് എന്നും കുറ്റപ്പെടുത്തി.
“യുഡിഎഫ് എന്ത് കൊണ്ട് കേരള നിയമസഭയിൽ ഒരു നിയമം കൊണ്ടു വന്നില്ല?. യുഡിഎഫിന്റെ ഒരാൾ പോലും ശബരിമല വിഷയത്തിൽ സമരം ചെയ്‌തിട്ടില്ല,”- കുമ്മനം പറഞ്ഞു.
നിയമസഭാ തിരഞ്ഞെടുപ്പിൽ പാർട്ടി പറഞ്ഞാൽ മൽസരിക്കുമെന്നും കുമ്മനം വ്യക്‌തമാക്കി. മൽസരിക്കണമെന്ന ആഗ്രഹം തനിക്കില്ല, അക്കാര്യം ആരോടും ആവശ്യപ്പെട്ടിട്ടുമില്ല. എന്നാൽ പാർട്ടി പറഞ്ഞാൽ മൽസര രംഗത്തുണ്ടാകും,- കുമ്മനം പറഞ്ഞു.
നേമത്ത് മുൻ മുഖ്യമന്ത്രി ഉമ്മൻചാണ്ടി മൽസരിക്കുമെന്ന അഭ്യൂഹങ്ങളോട് പ്രതികരിച്ച കുമ്മനം, ഉമ്മൻ ചാണ്ടിയല്ല പിണറായി മൽസരിച്ചാലും നേമത്ത് ബിജെപി ജയിക്കുമെന്നും കൂട്ടിച്ചേർത്തു.
Also Read: പതിനൊന്നാം ശമ്പള കമ്മീഷന്‍ റിപ്പോര്‍ട്ടിന് മന്ത്രിസഭയുടെ അംഗീകാരം
