ജനീവ: ലോകത്താകെ കോവിഡ് വ്യാപനം രൂക്ഷമാകുന്ന സാഹചര്യത്തില്‍ കുട്ടികള്‍ക്ക് മാര്‍ഗനിര്‍ദ്ദേശവുമായി ലോകാരോഗ്യ സംഘടന(ഡബ്ല്യൂ.എച്ച്.ഒ). 12 വയസിന് മുകളിലുള്ളവര്‍ നിര്‍ബന്ധമായും മാസ്‌ക് ധരിക്കണമെന്നും, സാമൂഹിക അകലം പാലിക്കണമെന്നും ലോകാരോഗ്യ സംഘടന മുന്നറിയിപ്പ് നല്‍കുന്നു. ലോകാരോഗ്യ സംഘടനയും യൂനീസെഫും സംയുക്തമായി വെബ്‌സൈറ്റിലൂടെയാണ് കുട്ടികള്‍ക്കുള്ള മാര്‍ഗനിര്‍ദ്ദേശം പുറത്തിറക്കിയത്
കൊറോണ പ്രതിരോധത്തില്‍ കുട്ടികളും ജാഗ്രത പാലിക്കണം. രോഗം പകരാന്‍ മുതിര്‍ന്നവരിലുള്ള അതേ സാദ്ധ്യതയാണ് കുട്ടികളിലും ഉള്ളതെന്ന് ലോകാരോഗ്യ സംഘടന വ്യക്തമാക്കുന്നു. ആറ് വയസിനും പതിനൊന്ന് വയസിനുമിടയില്‍ പ്രായമുള്ളവര്‍ സാഹചര്യങ്ങള്‍ക്കനുസരിച്ച് മാസ്‌ക് ധരിച്ചാല്‍ മതിയെന്നും ലോകാരോഗ്യ സംഘടന നിര്‍ദേശം നല്‍കി.
രോഗവ്യാപനമുള്ള സ്ഥലങ്ങള്‍, മാസ്‌ക് ഉപയോഗിക്കാനുള്ള പരിചയം, മുതിര്‍ന്നവരുടെ മേല്‍നോട്ടം എന്നിവ പരിഗണിക്കണമെന്നും അഞ്ച് വയസില്‍ താഴെയുള്ള കുട്ടികള്‍ക്ക് മാസ്‌ക് നിര്‍ബന്ധമില്ലെന്നും മാര്‍ഗനിര്‍ദേശത്തില്‍ ഉള്‍പ്പെടുന്നു. കുട്ടികളിലെ രോഗസാധ്യത കണക്കിലെടുത്താണ് ലോകാരോഗ്യ സംഘടനയും യൂനീസെഫും വെബ്‌സൈറ്റിലൂടെ മാര്‍ഗനിര്‍ദേശവുമായി എത്തിയത്.
