ന്യൂഡെല്ഹി: അരുണാചല് പ്രദേശില് നിന്ന് കാണാതായ അഞ്ച് യുവാക്കളെ ചൈന ഇന്ന് ഇന്ത്യക്ക് കൈമാറും. നിര്ദേശിക്കപ്പെട്ട സ്ഥലത്തുവെച്ച് ചൈനയുടെ പീപ്പിള്സ് ലിബറേഷന് ആര്മി യുവാക്കളെ ഇന്ത്യക്ക് കൈമാറും. കേന്ദ്രമന്ത്രി കിരണ് റിജിജു ട്വീറ്റില് അറിയിച്ചു.
സെപ്റ്റംബര് രണ്ടു മുതലാണ് ടാഗിന് ഗോത്രത്തില് പെട്ട അഞ്ച് യുവാക്കളെ അരുണാചലില് നിന്ന് കാണാതായത്. വേട്ടക്കായി ഇറങ്ങിയ ഏഴംഗ സംഘത്തില് നിന്ന് അഞ്ചുപേരേ കാണാതാവുക ആയിരുന്നു. കാണാതായവരെ ചൈനീസ് പട്ടാളം തട്ടികൊണ്ട് പോയതായി യുവാക്കളില് ഒരാളുടെ സഹോദരന് സോഷ്യല് മീഡിയയില് കുറിപ്പ് ഇട്ടിരുന്നു. ഇതോടെ യുവാക്കളെ കാണാതായ വിവരം അറിയിച്ച് ഇന്ത്യ ചൈനീസ് സൈന്യത്തിന് സന്ദേശമയച്ചു.
പിന്നീട് ഇവരെ കണ്ടെത്തിയതായി ചൈന അറിയിക്കുകയായിരുന്നു. വേട്ടക്കിടയില് യുവാക്കള് അബദ്ധത്തില് അതിര്ത്തി കടക്കുകയായിരുന്നു.