ന്യൂഡെല്‍ഹി : രാജ്യത്തെ കോവിഡ് ബാധിതരുടെ എണ്ണം 80 ലക്ഷം പിന്നിട്ടു. കഴിഞ്ഞ 24 മണിക്കൂറില്‍ രാജ്യത്ത് കോവിഡ് പോസിറ്റീവ് സ്‌ഥിരീകരിച്ചത് 48,881 ആളുകള്‍ക്കാണ്. ഇതോടെയാണ് രാജ്യത്തെ കോവിഡ് രോഗികളുടെ എണ്ണം 80 ലക്ഷം കടന്നത്. നിലവില്‍ രാജ്യത്ത് കോവിഡ് സ്‌ഥിരീകരിച്ച ആകെ ആളുകളുടെ എണ്ണം 80,40,203 ആണ്. പ്രതിദിന കോവിഡ് കേസുകളുടെ എണ്ണം 40000 ന് മുകളില്‍ ആണെങ്കിലും ഇത് താരതമ്യേന കുറഞ്ഞ കണക്കുകളാണ് ഇത്.
കഴിഞ്ഞ 24 മണിക്കൂറില്‍ രാജ്യത്ത് കോവിഡ് മുക്‌തരായ ആളുകളുടെ എണ്ണം 56,480 ആണ്. ഇതോടെ രാജ്യത്ത് ഇതുവരെ കോവിഡ് മുക്‌തരായ ആളുകളുടെ എണ്ണം 73,15,989 ആയി ഉയര്‍ന്നു. കോവിഡ് സ്‌ഥിരീകരിക്കുന്ന ആളുകളേക്കാള്‍ കോവിഡ് മുക്‌തരാകുന്ന ആളുകളുടെ എണ്ണം ഉയരുന്നതിനാല്‍ വലിയ ആശ്വാസമാണ് ഇത് രാജ്യത്ത് നല്‍കുന്നത്. ഒപ്പം തന്നെ കഴിഞ്ഞ ദിവസം രാജ്യത്ത് കോവിഡ് ബാധിച്ചു മരിച്ച ആളുകളുടെ എണ്ണം 517 ആണ്. ഇതോടെ രാജ്യത്ത് ഇതുവരെ കോവിഡ് രോഗബാധ മൂലം മരിച്ച ആളുകളുടെ എണ്ണം 1,20,527 ആണ്.
നിലവില്‍ രാജ്യത്ത് റിപ്പോര്‍ട്ട് ചെയ്‌ത ആകെ കോവിഡ് കേസുകളിലെ 15 ശതമാനം രോഗികളും കേരളത്തില്‍ നിന്നാണ്. കേരളത്തിലെയും മഹാരാഷ്‌ട്രയിലെയും പ്രതിദിന രോഗികളുടെ എണ്ണം കഴിഞ്ഞ ദിവസവും അയ്യായിരം കടന്നു. ഒപ്പം തന്നെ പശ്‌ചിമബംഗാള്‍, ഡെല്‍ഹി എന്നീ സംസ്‌ഥാനങ്ങളിലും പ്രതിദിന കണക്കുകള്‍ ആശങ്ക ഉയര്‍ത്തുന്ന വിധത്തില്‍ ഉയരുന്നുണ്ട്.
Read also : ഫ്രഞ്ച് പ്രസിഡണ്ടിന് എതിരായ ആക്രമണങ്ങളെ അപലപിച്ച് ഇന്ത്യ
