റിയാദ്: സൗദി അറേബ്യയിൽ കോവിഡ് വാക്സിൻ സ്വീകരിച്ചവരുടെ എണ്ണം നാലര കോടി കവിഞ്ഞു. സൗദി ആരോഗ്യമന്ത്രാലയം പുറത്തുവിട്ട കണക്കുകളിലാണ് ഇക്കാര്യം വ്യക്തമാക്കുന്നത്. ഇതുവരെയുള്ള പ്രതിദിന വാക്സിനേഷൻ കണക്കുകൾ പ്രകാരം 4,50,56,637 ആളുകളാണ് സൗദിയിൽ വാക്സിൻ സ്വീകരിച്ചത്.
വാക്സിൻ സ്വീകരിച്ച ആകെ ആളുകളിൽ 2,40,18,342 പേർ ആദ്യ ഡോസും, 2,10,38,295 പേർ രണ്ടാം ഡോസ് വാക്സിനും സ്വീകരിച്ചവരാണ്. കൂടാതെ 16,91,245 ഡോസ് വാക്സിൻ രാജ്യത്തെ പ്രായാധിക്യമുള്ളവർക്കാണ് നൽകിയത്.
അതേസമയം സൗദിയിൽ നിലവിൽ പ്രതിദിനം കോവിഡ് ബാധിക്കുന്നവരുടെ എണ്ണത്തിൽ കുറവ് രേഖപ്പെടുത്തുന്നുണ്ട്. 51 പേർക്കാണ് കഴിഞ്ഞ 24 മണിക്കൂറിൽ കോവിഡ് സ്ഥിരീകരിച്ചത്. കൂടാതെ 59 പേർ രോഗമുക്തി നേടുകയും ചെയ്തു. രാജ്യത്ത് നിലവിൽ കോവിഡ് ബാധിച്ച് ചികിൽസയിൽ കഴിയുന്നവരിൽ 77 പേരുടെ ആരോഗ്യനില മാത്രമാണ് ഗുരുതരമായി തുടരുന്നത്.
Read also: കൊടകര കുഴല്പ്പണക്കേസ്; നിലപാടറിയിക്കാന് ഇഡിയ്ക്ക് ഹൈക്കോടതിയുടെ കര്ശന നിര്ദ്ദേശം