ന്യൂ ഡെല്‍ഹി : നിര്യാതനായ കുവൈറ്റ് രാജ്യതലവനായ ഷെയ്ഖ് സബാഹ് അല്‍ അഹ്‌മദ് അല്‍ ജബേര്‍ അല്‍ സബയോടുള്ള ആദരസൂചകമായി നാളെ ഇന്ത്യയില്‍ ദേശീയ പതാക താഴ്‌ത്തിക്കെട്ടും. ഇതിന്റെ ഭാഗമായി നാളെ ഇന്ത്യയിലെ എല്ലാ സര്‍ക്കാര്‍ സ്‌ഥാപനങ്ങളിലെയും ദേശീയ പതാക താഴ്‌ത്തി കെട്ടി ദുഃഖാചരണം നടത്താന്‍ തീരുമാനമായിട്ടുണ്ട്. ഒപ്പം തന്നെ സംസ്‌ഥാനത്തും നാളെ ദുഃഖാചരണം നടത്താന്‍ തീരുമാനിച്ചു. അതിനായി സംസ്‌ഥാനത്തെ എല്ലാ സര്‍ക്കാര്‍ സ്‌ഥാപനങ്ങളിലും നാളെ ദേശീയ പതാക താഴ്‌ത്തിക്കെട്ടും. ഒപ്പം തന്നെ നാളെ സര്‍ക്കാര്‍ ഓഫീസുകളില്‍ ഔദ്യോഗിക പ്രവേശനം ഉണ്ടാകില്ലെന്നും അധികൃതര്‍ അറിയിച്ചു.
സെപ്റ്റംബര്‍ 29 നാണ് കുവൈറ്റ് രാജ്യതലവനായ ഷെയ്ഖ് സബാഹ് അല്‍ അഹ്‌മദ് നിര്യാതനായത്. ചികില്‍സക്കായി അമേരിക്കയിലെ റോച്ചസ്‌റ്ററിലെ മയോ ക്‌ളിനിക്കില്‍ പ്രവേശിപ്പിച്ചിരുന്നു. അവിടെ വച്ചാണ് അദ്ദേഹം മരിക്കുന്നത്. ജൂലായ് 18 ആം തീയതി ആശുപത്രിയില്‍ പ്രവേശിപ്പിച്ച ഇദ്ദേഹത്തിന് ഉടന്‍ തന്നെ ഓപ്പറേഷന്‍ നടത്തിയിരുന്നു. അതിന് ശേഷം സെപ്റ്റംബര്‍ 23 ആം തീയതിയാണ് ഇദ്ദേഹത്തെ അമേരിക്കയിലെ ആശുപത്രിയില്‍ പ്രവേശിപ്പിച്ചത്.
Read also : ഉത്തര്‍പ്രദേശ് സര്‍ക്കാരിനെതിരെ ഗുലാം നബി ആസാദ്
