ന്യൂഡെൽഹി: മാനനഷ്‌ടക്കേസിൽ ഈ മാസം 25ന് നേരിട്ട് ഹാജരാകാൻ കോൺഗ്രസ് നേതാവ് രാഹുൽ ഗാന്ധിക്ക് പാറ്റ്‌ന കോടതിയുടെ നിർദ്ദേശം. കേസിൽ ഇന്ന് ഹാജരാകാനായിരുന്നു നേരത്തെ കോടതി നിർദ്ദേശിച്ചിരുന്നത്. എന്നാൽ, സൂറത്ത് കോടതിയിലെ നടപടികളുടെ തിരക്കിലായതിനാൽ ഹാജരാകാനുള്ള തീയതി നീട്ടി നൽകണമെന്ന് രാഹുലിന്റെ അഭിഭാഷകൻ കോടതിയിൽ ആവശ്യപ്പെട്ടതിനെ തുടർന്നാണ് 25ലേക്ക് മാറ്റിയത്.
അന്നേ ദിവസം രാഹുൽ ഗാന്ധി നേരിട്ട് ഹാജരാകുമെന്ന് ഉറപ്പു വരുത്താൻ കോടതി രാഹുലിന്റെ അഭിഭാഷകനോട് ആവശ്യപ്പെട്ടു. മൊഴി രേഖപ്പെടുത്താനാണ് നേരിട്ട് ഹാജരാകാനുള്ള നിർദ്ദേശം. സൂറത്ത് കോടതിയിലേതിന് സമാനമായ കേസിലാണ് പാറ്റ്‌ന കോടതിയും രാഹുലിനെതിരെ നടപടി സ്വീകരിച്ചത്. മോദി സമുദായത്തെ അപകീർത്തിപ്പെടുത്തിയെന്ന് ആരോപിച്ചു ബീഹാർ മുൻ ഉപമുഖ്യമന്ത്രി സുശീൽ കുമാർ മോദി നൽകിയ ഹരജിയാണ് പാറ്റ്‌ന എംപി/ എംഎൽഎ പ്രത്യേക കോടതി പരിഗണിക്കുന്നത്.
Most Read: അരിക്കൊമ്പൻ പുനരധിവാസം; എവിടെ വിടാമെന്ന് സർക്കാരിന് തീരുമാനിക്കാം- ഹൈക്കോടതി
