ന്യൂഡെൽഹി: രാജ്യ തലസ്ഥാനത്തെ വായു മലിനീകരണ പ്രശ്നവുമായി ബന്ധപ്പെട്ട ഹരജി സുപ്രീം കോടതി ഇന്ന് പരിഗണിക്കും. വിദ്യാർഥിയായ ആദിത്യ ദുബേ സമർപ്പിച്ച പൊതുതാൽപര്യ ഹരജി ചീഫ് ജസ്റ്റിസ് എൻവി രമണ അധ്യക്ഷനായ ബെഞ്ചാണ് പരിഗണിക്കുന്നത്. വായു മലിനീകരണം കുറയ്ക്കാൻ കേന്ദ്രസർക്കാരും, ഡെൽഹി, ഹരിയാന, പഞ്ചാബ്, ഉത്തർപ്രദേശ് സംസ്ഥാനങ്ങളും സ്വീകരിച്ച നടപടികൾ കോടതി ഇന്ന് പരിശോധിക്കും.
വായു ഗുണനിലവാര കമ്മീഷന്റെ നേതൃത്വത്തിൽ പ്രവർത്തിക്കുന്ന അടിയന്തര ദൗത്യ സേനയുടെ പ്രവർത്തനവും കോടതി വിലയിരുത്തും. കാർഷിക അവശിഷ്ടങ്ങൾ കത്തിക്കുന്നതുമായി ബന്ധപ്പെട്ട വിഷയങ്ങളും കോടതിയുടെ പരിഗണനക്ക് വരുമെന്നാണ് കരുതുന്നത്. ശൈത്യകാലം ആരംഭിച്ചതോടെ ഡെൽഹിയിലെ വായു നിലവാരം കൂടുതൽ മോശം അവസ്ഥയിലേക്ക് എത്തിയിരിക്കുകയാണ്. നഗരത്തിലെ വായു ഗുണനിലവാര സൂചിക ഇന്നലെ 200 കടന്നിരുന്നു.
Read Also: മുല്ലപ്പെരിയാറിലെ മരംമുറി വിവാദം; ഉദ്യോഗസ്ഥന് എതിരായ അച്ചടക്ക നടപടി പിൻവലിച്ചു