കോഴിക്കോട്: കുതിരവട്ടം മാനസികാരോഗ്യ കേന്ദ്രത്തിന്റെ വികസന പ്രവർത്തനങ്ങൾ വേഗത്തിലാക്കാൻ തീരുമാനം. വികസന പ്രവർത്തനം സംബന്ധിച്ച വിശദമായ റിപ്പോർട് ഈ മാസം 31-നകം സർക്കാരിന് സമർപ്പിക്കാനും തീരുമാനമായി.
മന്ത്രി അഹമ്മദ് ദേവർകോവിലിന്റെ സാന്നിധ്യത്തിൽ ഇന്ന് ചേർന്ന ആശുപത്രി വികസന സമിതി യോഗത്തിലാണ് തീരുമാനം. കേന്ദ്രത്തിൽ നിന്ന് അന്തേവാസികൾ ചാടിപ്പോകുന്നത് പതിവായ സാഹചര്യത്തിൽ അഞ്ചാം വാർഡിലെ ഓട് മാറ്റി ഷീറ്റിടാൻ തീരുമാനമായി. എളുപ്പത്തിൽ ഓടിളക്കി രക്ഷപ്പെടുന്നത് ഒഴിവാക്കാൻ വാർഡിന്റെ താഴെ ഭാഗത്താണ് ഷീറ്റിടുക.
ഇവിടെ നിന്ന് ഏഴാം വാർഡിലേക്ക് പോകുന്ന ഭാഗത്തുള്ള മതിലിന് ഉയരം കൂട്ടും. ഒരു പാചകക്കാരനെ നിയമിക്കാൻ സർക്കാരിൽ ശുപാർശ ചെയ്യാനും യോഗം തീരുമാനിച്ചു. അന്തേവാസികളുടെ സുരക്ഷ ഉറപ്പാക്കാൻ പുതുതായി നാല് സെക്യൂരിറ്റി ജീവനക്കാരെ നിയമിച്ചിട്ടുണ്ട്. ഒഴിവുള്ള മറ്റ് തസ്തികകളിലേക്ക് ജീവനക്കാരനെ നിയമിക്കാൻ നിർദ്ദേശം നൽകിയതായി മന്ത്രി അറിയിച്ചു.
Most Read: വനിതാ ദിനത്തിൽ സ്ത്രീകൾക്ക് വണ്ടർലാ യാത്ര ഒരുക്കി കെഎസ്ആർടിസി