മസ്കറ്റ്: ഒമാനി ഡ്രൈവർ തസ്തികയിലെ വിസ പുതുക്കി ലഭിക്കുന്നതിനായി പുതിയ നിബന്ധന ഏർപ്പെടുത്തിയതായി റോയൽ ഒമാൻ പോലീസ്. ഡ്രൈവർ വിസ പുതുക്കുന്നതിന് കാലാവധിയുള്ള ലൈസൻസ് നിർബന്ധമാക്കിയാണ് ഉത്തരവിറങ്ങിയത്.
ജൂൺ ഒന്ന് മുതൽ ഈ നിബന്ധന പ്രാബല്യത്തിൽ വരും. തൊഴിൽ മന്ത്രാലയവുമായി ചേർന്നാണ് ഇതിനായുള്ള ക്രമീകരണങ്ങൾ ഒരുക്കിയത്. ലൈറ്റ്, ഹെവി തുടങ്ങിയ ലൈസൻസുകൾ വിസയിലുള്ള ജോലിക്ക് അനുയോജ്യമാണെങ്കിൽ മാത്രമേ അനുവദിക്കാൻ കഴിയൂ എന്നും പുതിയ ഉത്തരവിൽ പറയുന്നു.
ഇതുവരെ ഡ്രൈവർ വിസ പുതുക്കാൻ സാധുവായ ലൈസൻസ് ഉണ്ടായിരിക്കണം എന്ന നിബന്ധന നിലവിൽ ഇല്ലായിരുന്നു. ഡ്രൈവർ തസ്തികയിൽ സ്വദേശി വൽക്കരിച്ച വിഭാഗങ്ങളിലെ വിസ ഇനി പുതുക്കി ലഭിക്കില്ല.
ജനുവരി അവസാനം പുറത്തിറങ്ങിയ ഉത്തരവ് പ്രകാരം ഇന്ധനം, കാർഷിക ഉൽപന്നങ്ങൾ, ഭക്ഷ്യോൽപ്പന്നം എന്നിവ കൊണ്ടുപോകുന്ന വാഹനങ്ങളിൽ സ്വദേശി ഡ്രൈവർമാർക്ക് മാത്രമാണ് അനുമതി . മറ്റ് ചെറുകിട സ്ഥാപനങ്ങളിൽ നിബന്ധനകൾക്ക് വിധേയമായി വിദേശികളെ ജോലിക്കെടുക്കാൻ കഴിയും.
Read Also: വിപി ജോയ് അടുത്ത ചീഫ് സെക്രട്ടറി; തീരുമാനം മന്ത്രിസഭാ യോഗം അംഗീകരിച്ചു