കുവൈത്ത് സിറ്റി: സർക്കാർ അനുവദിച്ച പൊതുമാപ്പ് പ്രയോജനപ്പെടുത്താതെ രാജ്യത്ത് തുടരുന്ന അനധികൃത താമസക്കാർക്ക് എതിരെ നടപടിയെടുക്കാൻ കുവൈത്ത്. പിടിയിലാകുന്ന അനധികൃത താമസക്കാർക്കെതിരെ പിഴ ചുമത്തുമെന്നും കരിമ്പട്ടികയിൽ പെടുത്തുമെന്നും ആഭ്യന്തര മന്ത്രാലയത്തിലെ താമസാനുമതികാര്യ വിഭാഗം അസി. അണ്ടർസെക്രട്ടറി മേജർ ജനറൽ അൻവർ അൽ ബർജാസ് പറഞ്ഞു.
പിഴയില്ലാതെയും പുതിയ വിസയിൽ കുവൈത്തിൽ തിരിച്ചുവരാനുള്ള സൗകര്യത്തോടെയും കൊണ്ടുവന്ന പൊതുമാപ്പ് പ്രയോജനപ്പെടുത്താതെ രാജ്യത്ത് അനധികൃതമായി തങ്ങുന്നവരെ, കുവൈത്തിൽ തിരിച്ചുവരാനാകാത്തവിധം കരിമ്പട്ടികയിലും ഉൾപ്പെടുത്തും. വിമാനസർവീസുകൾ പുനരാരംഭിക്കുന്നതോടെ അനധികൃത താമസക്കാരെ പിടികൂടാനുള്ള ക്യാമ്പയിൻ ആരംഭിക്കുമെന്നും അദ്ദേഹം പറഞ്ഞു.