പാലക്കാട്: കനത്ത മഴയെ തുടർന്ന് ജില്ലയിലെ വെള്ളച്ചാട്ടങ്ങളിൽ ഒഴുക്ക് വർധിച്ചതിനാൽ അധികൃതർ കർശന നിയന്ത്രണം ഏർപ്പെടുത്തി. അപകട സാധ്യത മുന്നിൽ കണ്ടാണ് അധികൃതർ വിനോദ സഞ്ചാരികൾക്ക് നിയന്ത്രണം ഏർപ്പെടുത്തിയത്. ജില്ലയിൽ കഴിഞ്ഞ ദിവസങ്ങളിലായി ശക്തമായ മഴയാണ് ലഭിച്ചത്.
വിനോദ സഞ്ചാരികളുടെ ഇഷ്ട കേന്ദ്രമായ വാൽപാറ മല പ്രദേശങ്ങളിൽ ലഭിച്ച ശക്തമായ മഴയെ തുടർന്ന് മങ്കി ഫാൾസിൽ വെള്ളച്ചാട്ടത്തിന്റെ ഒഴുക്ക് വർധിച്ചു. ഇതോടെ മങ്കി ഫാൾസിൽ സഞ്ചാരികൾക്കായുള്ള ആന സവാരിയും നിർത്തിവെച്ചു. സമീപത്തെ അരുവി ഈ വർഷം രണ്ടാം തവണയാണ് നിറഞ്ഞ് കവിയുന്നത്. ഉദുമലൈ പേട്ട തിരുമൂർത്തി മലയിലെ പഞ്ചലിംഗ അരുവിയിലും വെള്ളച്ചാട്ടത്തിന്റെ ഒഴുക്ക് വർധിച്ചിട്ടുണ്ട്.
ഉദുമലൈ പേട്ട, ധളി, തിരുമൂർത്തി മല ഭാഗങ്ങളിലെ പ്രദേശങ്ങളിൽ പെയ്ത ശക്തമായ മഴയാണ് വെള്ളച്ചാട്ടത്തിന്റെ ഒഴുക്ക് വർധിക്കാൻ കാരണം. വെള്ളച്ചാട്ടം കാണാൻ എത്തുന്ന സഞ്ചാരികൾ അധികൃതരുടെ നിർദ്ദേശങ്ങൾ കർശനമായി പാലിക്കണം.
Read Also: സംസ്ഥാനത്ത് ശക്തമായ മഴ തുടരും; മൂന്ന് ജില്ലകളിൽ യെല്ലോ അലർട്