ന്യൂഡെൽഹി: നയതന്ത്രതലത്തിൽ പരസ്പരമുള്ള ഇരിപ്പുവശം ശരിയല്ലെങ്കിലും ഇന്ത്യ-ചൈന വ്യാപാര ഇടപാടിൽ 15.3 ശതമാനത്തിന്റെ വർധനയെന്ന് റിപ്പോർട്. ഈ വർഷം ആദ്യ മൂന്നുമാസം കൊണ്ട് 3196 കോടി ഡോളറിന്റെ ഇടപാടാണ് ഇരുരാജ്യങ്ങളും നടത്തിയതെന്ന് ചൈനീസ് കസ്റ്റംസ് പുറത്തുവിട്ട റിപ്പോർട്ടിൽ പറയുന്നു.
ഇക്കാലയളവിൽ ഇന്ത്യയിലേക്കുള്ള ചൈനയുടെ കയറ്റുമതി മുൻ വർഷം ഇതേ കാലയളവിനേക്കാൾ 28.3 ശതമാനം കൂടി 2710 കോടി ഡോളറിന്റേതാണ്. ഇന്ത്യയിൽനിന്നു ചൈനയിലേക്കുള്ള കയറ്റുമതി 26.1 ശതമാനം ഇടിഞ്ഞ് 487 കോടി ഡോളറായി.
കഴിഞ്ഞ വർഷം ഇന്ത്യ-ചൈന വ്യാപാര ഇടപാട് റെക്കോർഡ് നിലയായ 12,500 കോടി ഡോളറിനു മുകളിൽ എത്തിയിരുന്നു. ചൈനയുടെ കയറ്റുമതി 46.2 ശതമാനം വർധിച്ച് 9752 കോടി ഡോളറിന്റേതായിരുന്നു. ഇന്ത്യയുടെ ചൈനയിലേക്കുള്ള കയറ്റുമതി 34.2 ശതമാനം കൂടി 2814 കോടി ഡോളറായും മാറി.
മൊബൈൽ ഫോൺ മരുന്നു നിർമാണത്തിനുള്ള ഘടകങ്ങൾ എന്നിവ ഇന്ത്യ പ്രധാനമായും ചൈനയിൽ നിന്നാണ് ഇറക്കുമതി ചെയ്യുന്നത്. ചൈന ഇന്ത്യയിൽ നിന്ന് ഇറക്കുമതി ചെയ്യുന്നത് മുഖ്യമായും ഇരുമ്പയിരുമാണ്.
Read Also: സമരം തുടരും; നിലപാടിലുറച്ച് കെഎസ്ഇബി ഓഫിസേഴ്സ് അസോസിയേഷൻ