അബുദാബി: കണ്ണൂര്‍ സ്വദേശികളായ യുവാക്കള്‍ അബുദാബിയില്‍ വാഹനാപകടത്തില്‍ മരിച്ചു. കാര്‍ ട്രക്കുമായി കൂട്ടിയിടിച്ചുണ്ടായ അപകടത്തിലാണ് സുഹൃത്തുക്കളായ പിണറായി സ്വദേശി വലിയപറമ്പത്ത് റഹീമിന്റെ മകന്‍ റഫിനീദ്(29), അഞ്ചരക്കണ്ടി സ്വദേശി കണ്ണോത്ത് കാസിമിന്റെ മകന്‍ റാഷിദ് നടുക്കണ്ടി(28) എന്നിവര്‍ മരിച്ചത്.
വെള്ളിയാഴ്‌ച പുലര്‍ച്ചെ നാലിന് അല്‍ ഐന്‍-അബുദാബി റോഡിനു സമാന്തരമായുള്ള റോഡില്‍ വെച്ചാണ് അപകടം നടന്നത്. ഈസ്‌റ്റ് ബനിയാസില്‍ ജെംസ് കേംബ്രിഡ്ജ് ഇന്റര്‍നാഷനല്‍ സ്‌കൂളിനു സമീപം അല്‍ സൗദ് സ്ട്രീറ്റും അല്‍ വാദി സ്ട്രീറ്റും കൂടിച്ചേരുന്ന റൗണ്ട് എബൗട്ട് കഴിഞ്ഞ ഉടനെ ആയിരുന്നു അപകടം. ഇരുവരും സംഭവ സ്‌ഥലത്ത് വെച്ചുതന്നെ മരണപ്പെട്ടു.
യുവാക്കള്‍ സഞ്ചരിച്ച കാര്‍ ഇടിയുടെ ആഘാതത്തില്‍ രണ്ടായി പിളര്‍ന്നു. മൃതദേഹങ്ങള്‍ കാറില്‍ കുടുങ്ങിയ നിലയില്‍ ആയിരുന്നുവെന്നാണ് പോലീസ് പറയുന്നത്.
റഫിനീദ് ബനിയാസില്‍ ഓഫീസ് ബോയ് ആയും റാഷിദ് സെയില്‍സ്‌മാന്‍ ആയും ജോലി ചെയ്‌തു വരികയായിരുന്നു. ഇരുവരും അവിവാഹിതരാണ്. ബനിയാസ് സെന്‍ട്രല്‍ മോര്‍ച്ചറിയിലേക്ക് മാറ്റിയ മൃതദേഹങ്ങള്‍ നടപടിക്രമങ്ങള്‍ പൂര്‍ത്തിയാക്കി നാട്ടിലെത്തിക്കുമെന്ന് ബന്ധുക്കള്‍ അറിയിച്ചു.
Read Also: തിരഞ്ഞെടുപ്പ്; നൂറിലേറെ ബൂത്തുകളില്‍ മാവോവാദി ഭീഷണി; അധിക സുരക്ഷ ഒരുക്കുമെന്ന് കളക്‌ടര്‍
