കോഴിക്കോട്: കർശന നിയന്ത്രണങ്ങളോടെ കൊയിലാണ്ടി കാപ്പാട് ബീച്ച് തുറന്നു. സന്ദർശകർക്ക് കോവിഡ് വാക്‌സിൻ സർട്ടിഫിക്കറ്റ് നിർബന്ധമാണ്. കോവിഡ് വ്യാപനത്തെ തുടർന്ന് ബീച്ച് അടച്ചിട്ടിരിക്കുകയായിരുന്നു. തുടർന്ന് ജില്ലയിൽ രോഗ സ്‌ഥിരീകരണത്തിന്റെ തോത് കുറഞ്ഞതോടെയാണ് കാപ്പാട് ബ്‌ളൂഫാഗ് ബീച്ച് സഞ്ചാരികൾക്കായി തുറന്ന് കൊടുത്തത്.
മുതിർന്നവർക്ക് 25 രൂപയും, പത്തിനും പതിനെട്ടിനും ഇടയിൽ പ്രായമുള്ളവർക്ക് പത്ത് രൂപയും പ്രവേശന ഫീസുണ്ട്. അതേസമയം, ചെറിയ കുട്ടികൾക്ക് പ്രവേശന ഫീസില്ല. സന്ദർശകർ എത്തിയതോടെ ബീച്ചിന് സമീപത്തെ ഉന്തുവണ്ടികളും പെട്ടിക്കടകളുമെല്ലാം സജീവമായി. തുവ്വപ്പാറയ്‌ക്ക് സമീപമുള്ള ബീച്ചുകളിലും സഞ്ചാരികൾ ഏറെ എത്തുന്നുണ്ട്.
കോവിഡ് നിയന്ത്രണത്തെ തുടർന്ന് അടച്ചിട്ടിരുന്ന കാപ്പാട് ബീച്ചിൽ നിർമാണ പ്രവൃത്തികളും അറ്റകുറ്റപ്പണികളും നടത്തിവരികയാണ്. പഴയ ഗേറ്റ് മാറ്റി പുതിയത് നിർമിക്കുന്ന പണി നടക്കുകയാണ്. അതേസമയം, കാപ്പാടിലേക്കുള്ള പാതകളെല്ലാം തകർന്ന് കിടക്കുകയാണ്. മൂന്ന് മാസം മുൻപ് ഉണ്ടായ ശക്‌തമായ കടലേറ്റത്തിലാണ് പാതയോരങ്ങൾ വൻതോതിൽ തകർന്നത്.
Read Also: ഉവൈസിയുടെ ഔദ്യോഗിക വസതി ആക്രമിച്ചു; ഹിന്ദു സേന പ്രവർത്തകർ അറസ്‌റ്റിൽ
