ന്യൂഡെല്‍ഹി: ബംഗാളില്‍ വെച്ച് ബിജെപി ദേശീയ അധ്യക്ഷന് ജെപി നഡ്ഡയുടെ വാഹനവ്യൂഹത്തിന് നേരെ ഉണ്ടായ ആക്രമണത്തില്‍ പ്രതികരണവുമായി മുതിര്‍ന്ന കോണ്‍ഗ്രസ് നേതാവ് അധിര്‍ രഞ്‌ജന്‍ ചൗധരി രംഗത്ത്.
ബിജെപി ദേശീയ അധ്യക്ഷന് നേരെ നടന്ന ആക്രമണം പശ്‌ചിമ ബംഗാളിലെ ക്രമസമാധാനില തകര്‍ന്നതിന്റെ തെളിവാണെന്ന് അധിര്‍ രഞ്‌ജന്‍ ചൗധരി പറഞ്ഞു. ഉത്തര്‍പ്രദേശ് ഉള്‍പ്പടെയുള്ള സ്‌ഥലങ്ങളിലും സമാനമായ സംഭവങ്ങള്‍ തന്നെയാണ് നടക്കുന്നതെന്നും അദ്ദേഹം കുറ്റപ്പെടുത്തി.
മാത്രവുമല്ല ക്രമസമാധാനനില തകര്‍ന്ന സാഹചര്യത്തില്‍ ബംഗാളില്‍ രാഷ്‌ട്രപതി ഭരണം പ്രഖ്യാപിക്കുകയാണ് വേണ്ടതെന്നും മുതിര്‍ന്ന കോണ്‍ഗ്രസ് നേതാവ് കൂട്ടിച്ചേര്‍ത്തു. ഇക്കാര്യത്തില്‍ തീരുമാനമെടുക്കേണ്ടത് കേന്ദ്ര സര്‍ക്കാരാണെന്നും അദ്ദേഹം വ്യക്‌തമാക്കി.
രണ്ട് ദിവസത്തെ ബംഗാള്‍ സന്ദര്‍ശനത്തിനെത്തിയ നഡ്ഡയുടെ വാഹനവ്യൂഹത്തിന് നേരെ വ്യാഴാഴ്‌ചയാണ് ആക്രമണമുണ്ടായത്. ആക്രമണത്തിന് മുന്നില്‍ തൃണമൂല്‍ കോണ്‍ഗ്രസ് ആണെന്ന് ആരോപിച്ച് പശ്‌ചിമ ബംഗാള്‍ മുഖ്യമന്ത്രി മമത ബാനര്‍ജിക്കെതിരെ ബിജെപി നേതാക്കള്‍ കൊലവിളിയുമായി രംഗത്തെത്തിയിരുന്നു. അതേസമയം കര്‍ഷക സമരത്തില്‍ നിന്നും മറ്റും ശ്രദ്ധ തിരിച്ചുവിടാന്‍ കേന്ദ്ര സര്‍ക്കാരിന്റെ അറിവോടെ അരങ്ങേറിയ നാടകം എന്നായിരുന്നു നഡ്ഡക്ക് നേരെ നടന്ന ആക്രമണത്തില്‍ മമത ബാനര്‍ജിയുടെ പ്രതികരണം.
Read Also: നായയെ ഓടുന്ന കാറിനു പിന്നില്‍ കെട്ടിവലിച്ച സംഭവത്തില്‍ ഡ്രൈവര്‍ അറസ്‌റ്റില്‍
