പഴയങ്ങാടി: വിവാഹ വാഗ്ദാനം നൽകി നിരവധി സ്ത്രീകളെ തട്ടിപ്പിനിരയാക്കിയ 52കാരനെ പോലീസ് വലയിലാക്കി. എറണാകുളം പറവൂർ സ്വദേശി എംപി ശ്രീജനാണ് പിടിയിലായത്. പഴയങ്ങാടി എസ്ഐ ഇ ജയചന്ദ്രന്റെ നേതൃത്വത്തിലുള്ള സംഘമാണ് ഇയാളെ അറസ്റ്റ് ചെയ്തത്.
ഇന്ത്യൻ റെയിൽവേയിൽ ലോക്കോ പൈലറ്റായി ജോലി ചെയ്യുകയാണെന്നും ബിരുദധാരിയാണെന്നും വരുത്തിത്തീർത്ത് ഗ്രാമങ്ങളിലെ വിവാഹ ബ്യൂറോകളിൽ രജിസ്റ്റർ ചെയ്താണ് ഇയാൾ തട്ടിപ്പ് നടത്തിയിരുന്നത്.
പഴയങ്ങാടിയിൽ ഒരു സ്ത്രീയോടൊപ്പം താമസിച്ച് വരുന്നതിനിടെ സ്ഥലത്തെ വിവാഹ ബ്യൂറോ വഴി വെങ്ങരയിൽ ഒരു സ്ത്രീയെ ഇയാൾ പരിചയപ്പെട്ടു. തുടർന്ന് ഇവർക്ക് വിവാഹ വാഗ്ദാനം നൽകി തട്ടിപ്പ് നടത്താൻ ശ്രമിക്കുന്നതിനിടെയാണ് ഇയാളെ പോലീസ് പിടികൂടിയത്.
മലപ്പുറത്തായിരുന്ന ഇയാളെ തന്ത്രപൂർവം കണ്ണൂരിലെത്തിച്ച് അറസ്റ്റ് ചെയ്യുകയായിരുന്നു. തുടർന്ന് പയ്യന്നൂർ കോടതി ശ്രീജനെ റിമാൻഡ് ചെയ്തു.
Also Read: നിഴലുകളില് നിന്നും നക്ഷത്രങ്ങളിലേക്ക്; രോഹിത് വെമുലയുടെ ഓര്മകള്ക്ക് അഞ്ചു വയസ്