പാരീസ്: ഫ്രഞ്ച് ലീഗില്‍ 100 ഗോളുകള്‍ നേടുന്ന ഏറ്റവും പ്രായം കുറഞ്ഞ താരം എന്ന നേട്ടം സ്വന്തമാക്കി ഫ്രഞ്ച് താരം കിലിയൻ എംബപെ. ഇന്നലെ ലീഗിൽ ഒളിമ്പിക് ലിയോണിനെതിരെ നടന്ന മൽസരത്തിലാണ് താരം ഈ നേട്ടം കൈവരിച്ചത്. ഒളിമ്പിക് ലിയോണിനെ രണ്ടിനെതിരെ നാല് ഗോളുകള്‍ക്ക് പിഎസ്‌ജി അടിയറവ് പറയിക്കുകയും ചെയ്‌തിരുന്നു. രണ്ട് ഗോളുകള്‍ നേട്ടവുമായി കളിയിൽ എംബാപെ മിന്നും പ്രകടനമാണ് കാഴ്‌ചവെച്ചത്.
142 കളികളില്‍ നിന്നുമാണ് എംബപെ 100 ഗോളുകളെന്ന നേട്ടം സ്വന്തമാക്കിയത്. താരം നേടിയ 100 ഗോളുകളില്‍ 84 എണ്ണവും പിഎസ്‌ജിക്ക് വേണ്ടിയാണ്. ബാക്കി 16 എണ്ണം താരം നേടിയത് മോണാക്കോയില്‍ കളിക്കുന്ന കാലത്താണ്.
അതേസമയം ഇന്നലത്തെ ജയത്തോട് കൂടി പിഎസ്‌ജി ലീഗില്‍ ഒന്നാം സ്‌ഥാനത്തെത്തി. 30 കളികളില്‍ നിന്നായി 63 പോയിന്റാണ് ടീം നേടിയത്. എംബപെക്കു പുറമെ ഡാനിലോയും ഡി മരിയയുമാണ് ഇന്നലെ പിഎസ്‌ജിക്ക് വേണ്ടി ഗോളുകള്‍ നേടിയത്. മറുവശത്തു പകരക്കാരനായി ഇറങ്ങിയ ഇസ്ളാം സിമാനിയും മാക്‌സ്‌വെൽ കോര്‍ണെറ്റുമാണ് ലിയോണിന് വേണ്ടി ആശ്വാസ ഗോളുകള്‍ നേടിയത്. പരിക്കുമൂലം ആറാഴ്‌ചയോളം കളിക്കാന്‍ പറ്റാതിരുന്ന നെയ്‌മർ ഇന്നലെ കളിക്കളത്തിൽ ഇറങ്ങിയിരുന്നു.
Read Also: ജോജു ജോർജിന്റെ ‘പീസ്‌’ ചിത്രീകരണം പൂർത്തീകരിച്ചു
