പാപ്പിനിശ്ശേരി: കണ്ണൂർ പാപ്പിനിശ്ശേരി റെയിൽവേ മേൽപ്പാലത്തിന് ഭീഷണിയായി വീണ്ടും കുഴികൾ. പല സ്‌ഥലങ്ങളിലും ടാറിങ് ഇളകി ചെറുതും വലുതുമായ നിരവധി കുഴികളാണ് പാലത്തിൽ പ്രത്യക്ഷപ്പെട്ടത്. കഴിഞ്ഞ രണ്ടുദിവസമായി മഴ കനത്തതോടെ റോഡിന്റെ പല ഭാഗത്തും ടാറിങ്ങിൽ വിള്ളലും ഉണ്ടായിട്ടുണ്ട്.
പാലം നിർമാണത്തിലെ അപാകതയെ കുറിച്ച് വിജിലൻസ് അന്വേഷണം നടക്കുന്നുണ്ട്. അതിനിടയിലാണ് പാലത്തിൽ നിരവധി തകരാറുകളും ശ്രദ്ധയിൽപ്പെടുന്നത്. ഒന്നരമാസം മുൻപ് റെയിൽവേ ലൈനിന്റെ സമീപം മേൽപ്പാലത്തിന്റെ അടിഭാഗത്ത് കോൺക്രീറ്റ് പാളി അടർന്ന് വീണിരുന്നു.
ഇതോടൊപ്പം അതേ ഭാഗത്ത് മേൽപ്പാലത്തിന്റെ കൈവരിയും ദ്രവിച്ച അവസ്‌ഥയിലായിരുന്നു. ഇതിനെ തുടർന്ന് രണ്ടാഴ്‌ച മുൻപ് ഇവിടെ അറ്റകുറ്റപണികൾ നടത്തിയിരുന്നു. ഇപ്പോൾ ഇതേ സ്‌ഥലത്തിന്റെ മുകൾ ഭാഗത്തെ റോഡിലാണ് കുഴികൾ പ്രത്യക്ഷപ്പെട്ടിട്ടുള്ളത്. അതേസമയം, ലോക്ക്ഡൗൺ കാരണം വാഹനഗതാഗതം കുറഞ്ഞത് കുഴികളുടെ എണ്ണവും ആഴവും വർധിക്കാതിരിക്കാൻ കാരണമാകുന്നുണ്ട്.
Read also: ജില്ലയിൽ 3 ചാക്ക് നിരോധിത പുകയില ഉൽപ്പന്നങ്ങൾ പിടികൂടി; 2 പേർ അറസ്‌റ്റിൽ
