ലഖ്‌നൗ: ഉത്തർപ്രദേശ് നിയമസഭാ കൗൺസിൽ ഗാലറിയിൽ സവർക്കറിന്റെ ചിത്രം പതിപ്പിച്ച നടപടി വിവാദത്തിൽ. ചിത്രം മാറ്റണമെന്ന് ആവശ്യപ്പെട്ട് കോൺഗ്രസിന്റെ നിയമാസഭാ കൗൺസിൽ അംഗം ദീപക് സിങ് ചെയർമാന് കത്ത് നൽകി.
സ്വാതന്ത്ര്യ സമര പോരാളികളുടെ ചിത്രങ്ങൾക്കൊപ്പം സവർക്കറിന്റെ ചിത്രം പതിപ്പിച്ചത് അപമാനകരമാണെന്നാണ് ദീപക് സിംഗ് കത്തിൽ പറയുന്നത്. ചിത്രം കൗൺസിലിൽ നിന്ന് നീക്കം ചെയ്‌ത്‌ ബിജെപി ഓഫീസിലാണ് പതിപ്പിക്കേണ്ടതെന്നും കത്തിൽ പറയുന്നുണ്ട്. കത്ത് പരിഗണിച്ച ചെയർമാൻ ആവശ്യമായ നടപടികൾ സ്വീകരിക്കാൻ പ്രിൻസിപ്പൽ സെക്രട്ടറിക്ക് നിർദേശം നൽകിയതായി ദീപക് സിങ് മാദ്ധ്യമങ്ങളോട് പ്രതികരിച്ചു.
മുഖ്യമന്ത്രി യോഗി ആദിത്യനാഥാണ് ചൊവ്വാഴ്‌ച ചിത്രം നിയമസഭാ കൗൺസിൽ ഗാലറിയിൽ അനാച്ഛാദനം ചെയ്തത്. സവർക്കറിനെ മഹാനായ സ്വാതന്ത്ര്യ സമര പോരാളിയെന്ന് വിശേഷിപ്പിച്ചുകൊണ്ടാണ്‌ ആദിത്യനാഥ്‌ ചിത്രം അനാച്ഛാദനം ചെയ്തത്. സവർക്കറിന്റെ വ്യക്‌തിത്വം എല്ലാ ഇന്ത്യക്കാർക്കും പ്രചോദനമാണെന്നും അദ്ദേഹം പറഞ്ഞിരുന്നു.
Read also: ഒറ്റക്കല്ല ഒപ്പമുണ്ട്; സംസ്‌ഥാനത്ത് 66 ലക്ഷം പേര്‍ക്ക് സൈക്കോ സോഷ്യല്‍ സപ്പോര്‍ട്ട് ലഭ്യമാക്കി
