ബംഗളൂരു: ടിആര്‍പി അഴിമതിക്കേസില്‍ റിപബ്ളിക് ടിവി സിഒഒ പ്രിയ മുഖര്‍ജിക്ക് കര്‍ണാടക ഹൈക്കോടതി ട്രാന്‍സിറ്റ് ജാമ്യം അനുവദിച്ചു. മുംബൈ പൊലീസ് രജിസ്‌റ്റര്‍ ചെയ്‌ത കേസില്‍ ബംഗളൂരുവില്‍ വെച്ച് ഇവരെ ചോദ്യം ചെയ്യാനിരിക്കെയാണ് ജാമ്യം. ഹൈക്കോടതി ജഡ്ജി എച്ച്പി സന്ദേശാണ് 20 ദിവസത്തേക്ക് ജാമ്യം അനുവദിച്ചത്.
നേരത്തെ രണ്ടു തവണ പ്രിയ മുഖര്‍ജി മുംബൈ പൊലീസിന് മുന്നില്‍ ചോദ്യം ചെയ്യലിന് ഹാജരായിരുന്നു. ഇതിനിടെ റിപബ്ളിക് ടിവി വിതരണ വിഭാഗം മേധാവി ഘനശ്യാം സിംഗിനെ ചോദ്യം ചെയ്‌തതില്‍നിന്ന് പ്രിയ മുഖര്‍ജിക്കെതിരായ മൊഴി അന്വേഷണ സംഘത്തിന് ലഭിച്ചിരുന്നു.
ഇരുവരും തമ്മിലുള്ള മൊബൈല്‍ ചാറ്റ് വിവരങ്ങള്‍ പ്രിയ ഡിലീറ്റ് ചെയ്‌തതായാണ് വിവരം. ഇതുസംബന്ധിച്ച് ഇവരെ വീണ്ടും ചോദ്യം ചെയ്യാനായിരുന്നു മുംബൈ പൊലീസിന്റെ തീരുമാനം.
കുടുംബാംഗങ്ങളെ കാണാന്‍ കര്‍ണാടകയിലെത്തിയ പ്രിയയോട് ബംഗളൂരുവിലെ പൊലീസ് സ്‌റ്റേഷനില്‍ ചോദ്യം ചെയ്യലിന് ഹാജരാവാന്‍ സമന്‍സ് നല്‍കി. ഇതോടെ ഹരജിക്കാരി ട്രാന്‍സിറ്റ് ജാമ്യത്തിനായി കര്‍ണാടക ഹൈക്കോടതിയെ സമീപിക്കുകയായിരുന്നു.
പ്രിയ മുഖര്‍ജി ചാറ്റ് വിവരങ്ങള്‍ ഡിലീറ്റ് ചെയ്‌തത് ദുരൂഹമാണെന്ന് പ്രോസിക്യൂഷന്‍ ഉന്നയിച്ചപ്പോള്‍ താന്‍ എല്ലാ ജീവനക്കാരുമായും ചാറ്റ് ചെയ്യാറുണ്ടെന്നും എന്നാല്‍, അവ ഡിലീറ്റ് ചെയ്യുന്ന സ്വഭാവം തനിക്കുണ്ടെന്നുമായിരുന്നു അവരുടെ മറുപടി.
Read also: തീവ്രവാദ കേസ്; പിഡിപി യുവജന അധ്യക്ഷനെ അറസ്‌റ്റ് ചെയ്‌തു
