ന്യൂഡെൽഹി: കോവിഡ് വാക്‌സിന്റെ കരുതൽ ഡോസ് സ്വീകരിക്കാനുള്ള ഇടവേള 6 മാസമായി കുറക്കാൻ ശുപാർശ. കേന്ദ്ര സർക്കാരിന്റെ വാക്‌സിനേഷനായുള്ള ഉപദേശക സമിതിയാണ് ശുപാർശ ചെയ്‌തിരിക്കുന്നത്‌. രണ്ടാമത്തെ ഡോസ് സ്വീകരിച്ച് 9 മാസത്തിന് ശേഷമാണ് കരുതൽ ഡോസ് നൽകുന്നത്. ഈ ഇടവേള ആറ് മാസമായി കുറയ്‌ക്കാനാണ് ശുപാർശ.
ജൂൺ 29ആം തീയതി ചേരുന്ന വിദഗ്‌ധ സമിതി യോഗത്തിൽ ഇക്കാര്യത്തിൽ അന്തിമ തീരുമാനം എടുക്കും. നേരത്തെ വിദേശത്തേക്ക് യാത്ര ചെയ്യേണ്ടവർക്ക് കോവിഡ് കരുതൽ ഡോസ് മൂന്ന് മാസത്തെ ഇടവേളയിൽ സ്വീകരിക്കാൻ കേന്ദ്രസർക്കാർ അനുമതി നൽകിയിരുന്നു.
നിലവിൽ രാജ്യത്ത് 18 വയസിന് മുകളിൽ ഉള്ള എല്ലാവർക്കും കരുതൽ ഡോസ് സ്വീകരിക്കാൻ അനുമതിയുണ്ട്. എന്നാൽ ഇക്കാര്യത്തിൽ പൊതുജനങ്ങൾ വലിയ താൽപര്യം കാണിക്കുന്നില്ലെന്നാണ് വിലയിരുത്തൽ. ഈ സാഹചര്യത്തിലാണ് ഇപ്പോൾ കരുതൽ ഡോസ് സ്വീകരിക്കാനുള്ള ഇടവേള കുറയ്‌ക്കാൻ അധികൃതർ ശുപാർശ ചെയ്‌തത്‌.
Read also: അനധികൃത മണ്ണെടുപ്പ് ചോദ്യം ചെയ്‌തു; യുവതിക്ക് ക്രൂരമർദ്ദനം-കേസെടുത്ത് പോലീസ്
