ന്യൂഡെൽഹി: രാജ്യത്തെ ഏറ്റവും വലിയ പൊതുമേഖലാ ബാങ്കുകളിൽ ഒന്നായ സ്റ്റേറ്റ് ബാങ്ക് ഓഫ് ഇന്ത്യയുടെ മൊബൈൽ ആപ്പായ ‘യോനോ‘ വീണ്ടും തകരാറിലായി. ആപ്പ് വഴി സേവനങ്ങൾ നടത്താൻ കഴിയുന്നില്ല എന്ന് ചൂണ്ടിക്കാട്ടി നിരവധി ആളുകളാണ് സോഷ്യൽ മീഡിയയിൽ രംഗത്ത് വന്നത്. ഇടപാടുകൾ നടത്താൻ ആപ്പ് തുറക്കാൻ പോലും കഴിയുന്നില്ലെന്ന് പലരും സ്ക്രീൻ ഷോട്ട് സഹിതം ചൂണ്ടിക്കാട്ടുന്നു. ബാങ്കിന്റെ അനാസ്ഥക്ക് എതിരെ രൂക്ഷമായ പ്രതികരണങ്ങളും ഉയരുന്നുണ്ട്.
നേരത്തെയും യോനോക്ക് എതിരെ സമാനമായ പരാതികൾ ഉയർന്നിരുന്നു. സ്വകാര്യ ബാങ്കുകൾ ഉൾപ്പെടെ മികച്ച ഗുണനിലവാരമുള്ള ആപ്പുകൾ വികസിപ്പിക്കുകയും, ഉന്നത നിലവാരത്തിലുള്ള സേവനങ്ങൾ ലഭ്യമാക്കുകയും ചെയ്യുമ്പോൾ എസ്ബിഐ പുറം തിരിഞ്ഞ് നിൽക്കുകയാണെന്ന് പലരും പറയുന്നു. ഇത്തരം നിലപാടുകൾ മാറ്റു ബാങ്കുകൾ തേടി പോവാൻ ഇടപാടുകാരെ പ്രേരിപ്പിക്കുമെന്നും വിമർശനം ഉയരുന്നു.
2017ലാണ് എസ്ബിഐ ഓൺലൈൻ മുഖേന ബാങ്കിംഗ് സേവനങ്ങൾ ലഭ്യമാക്കാനായി യോനോ ഡിജിറ്റൽ ആപ്പ് പുറത്തിറക്കിയത്. ബാങ്കിംഗ്, ലൈഫ്സ്റ്റൈൽ, ഇൻഷുറൻസ്, ഇൻവെസ്റ്റ്മെന്റ്, ഷോപ്പിംഗ് എന്നിവക്ക് എല്ലാം കൂടിയാണ് യോനോയെ അവതരിപ്പിച്ചത്.
Read Also: അവധിക്കാല വില്പനയില് റെക്കോര്ഡിട്ട് ആമസോണ്