കുവൈത്ത് സിറ്റി: കുവൈത്തിൽ കോവിഡ് വ്യാപനത്തിന്റെ രണ്ടാം ഘട്ടം ആരംഭിച്ചതായി സർക്കാർ വൃത്തങ്ങളെ ഉദ്ധരിച്ച് അൽ റായ് പത്രം റിപ്പോർട്ട്‌ ചെയ്‌തു. കോവിഡ് രോഗബാധിതരുടെ എണ്ണത്തിൽ വൻ വർദ്ധനവാണ് രേഖപ്പെടുത്തുന്നത്. കഴിഞ്ഞ ദിവസം 5 എംപിമാർക്ക് കോവിഡ് ബാധ സ്ഥിരീകരിച്ചിരുന്നു. ലക്ഷണങ്ങൾ പ്രകടിപ്പിച്ചതിനെ തുടർന്ന് ഇവർ സ്വയം പരിശോധനക്ക് വിധേയരാവുകയായിരുന്നു. നാഷണൽ അസംബ്ലിക്ക് മുന്നോടിയായുള്ള പരിശോധനയിൽ ആയിരുന്നില്ല ഇവർക്ക് രോഗബാധ സ്ഥിരീകരിച്ചത്.
ഒക്ടോബർ പകുതിയോടെ രാജ്യത്തെ കോവിഡ് ബാധയിൽ വലിയ വർദ്ധനവ് രേഖപ്പെടുത്തുമെന്നാണ് പഠനങ്ങൾ സൂചിപ്പിക്കുന്നത്. എന്നാൽ ഇതിനെക്കുറിച്ച് സർക്കാർ വൃത്തങ്ങൾ ഔദ്യോഗികമായി പ്രതികരിച്ചിട്ടില്ല. കോവിഡ് ബാധ നിയന്ത്രിക്കാൻ സർക്കാർ മാർഗനിർദ്ദേശങ്ങൾ കൃത്യമായി പാലിക്കണമെന്ന് അവർ ആവശ്യപ്പെട്ടിരുന്നു.
കഴിഞ്ഞ ദിവസം വാൽവ് ഘടിപ്പിച്ച മാസ്കുകളുടെ ഇറക്കുമതിക്ക് കുവൈത്ത് നിരോധനം ഏർപ്പെടുത്തിയിരുന്നു. കോവിഡ് പ്രതിരോധത്തിന് ഇത്തരം മാസ്‌കുകൾ ഫലപ്രദമല്ലെന്ന് കണ്ടെത്തിയതിനെ തുടർന്നാണ് നടപടി.
