മലപ്പുറം: വിദ്യാരംഗം കലാ സാഹിത്യ വേദി സംഘടിപ്പിച്ച ‘പകർന്നാട്ടം 2020′ എന്ന ഒറ്റയാൾ നാടക മൽസരത്തിൽ ‘വക്രദൃഷ്ടി’ക്ക് ഒന്നാം സ്ഥാനം ലഭിച്ചു. മലപ്പുറം ജില്ലയിലെ അധ്യാപകർക്കായ് ഓൺലൈനിൽ നടത്തിയ മൽസരത്തിൽ 16 നാടകങ്ങളാണ് പങ്കെടുത്തത്.
നാടകം ഷൂട്ട് ചെയ്ത് ഓൺലൈനിൽ അവതരിപ്പിക്കുന്ന പുതിയ രീതിയാണ് സംഘാടകർ നടപ്പിലാക്കിയത്. തിരൂർ ആലത്തിയൂർ കെഎച്ച്എം സ്കൂളിലെ ചിത്രകലാ അധ്യാപകനും കോഴിക്കോട് ചേമഞ്ചേരി കലാവേദിയിലെ നാടക പ്രവർത്തകനും കൂടിയായ ഉദയേഷ് ചേമഞ്ചേരിയാണ് നാടകത്തിൽ കഥാപാത്രമായത്.
മലപ്പുറം ജില്ലയിലെ അധ്യാപകർക്കിടയിലാണ് വിദ്യാരംഗം കലാ സാഹിത്യ വേദി മൽസരം സംഘടിപ്പിച്ചത്. ഹത്രസിൽ കൂട്ടബലാല്സംഗത്തിന് ഇരയായ പെൺകുട്ടിയുടെ ജീവിതത്തിലൂടെയാണ് ‘വക്രദൃഷ്ടി’ യുടെ കഥ കടന്നു പോകുന്നത്. ദീപു തൃക്കോട്ടൂരാണ് നാടകത്തിന്റെ രചനയും സംവിധാനവും നിർവ്വഹിച്ചത്.
Most Read: ആശുപത്രിയിൽ ഡോക്ടർ എത്തുന്നില്ല; മൃഗങ്ങളുമായി നാട്ടുകാരുടെ പ്രതിഷേധം